انا المنفي داخل جسمي
داخل تمثال سارق اسمي
لا حلمه يوم حضن حلمي
ولا عيشته بتشبه لي
،،،،،،،،،،،،،،،،،،،،،،،
انا المنفي وانا المسجون
داخل دايرة ومقفوله
انا الروح اللي سهله تهون
ما دام الجسم عاش صورة
،،،،،،،،،،،،،،،،،،،،،،،
وانا الروح اللي كتبت عقد
هتسكن في جسد انسان
وبعد العقد جالها الرد
بحكم ف سجن مـ الاحزان
،،،،،،،،،،،،،،،،،،،،،،،
وسجن حياتي كان مبني
ما بين القلب وضلوعي
سنين الوحده تدبحني
وينزل دمي ف دموعي
،،،،،،،،،،،،،،،،،،،،،،،
واحفر في تراب الارض
اشوف كام ضحكة مدفونه
ما لاقي غير هموم بالعرض
لناس قبليا مسجونه
،،،،،،،،،،،،،،،،،،،،،،،
واي فرحة بتزورني
بتبقي ف حلم وانا نايم
يدوب تسألني عن حالي
اقول حالي خلاص صايم
،،،،،،،،،،،،،،،،،،،،،،،
ومين عايش غير الفرحان
ومين مرتاح غير الانسان
منا الروح اللي منفيه
داخل تمثال بقالها زمان
ــــــــــــ
احمدرمضان
https://www.facebook.com/alfilsofahmed
