أحلى ما فيا إني شبهك
*****************
أمي ...
كل ما أكتبلك ما الاقي
أى كلمه توفيكِ حقك
كل ما أكتب ارجع أمسح
ولا حرف شبهك
مهما قولت يا أمي عنك
نقطه فـ بحرك
ضمه فـ حضنك
خايفة أطول
و الكلام ياخدني عنك
اعترف لك..
إني طول عمري أقولك
إني مش عاوزه أبقى شبهك
إنتِ الحنان عندك زياده
والطيبه الزمن ده عياده
عماله تدي دي وده
وإنتِ فين يا أمي حقك
إنتِ متساهلة في حقك
تشدي على أخويا الصغير
وبسرعه تجري
تخديه في حضنك
ألوم وأقولك..
وأتاريني نسخه منك
بالظبط زيك
على أي حاجه
دمعتي من عيني تجري
من أى كلمه يدق قلبي
أسمع دقاته دُغرى
لكن بخبي
خوف وضعف مش قوة يعني
وبردو برمي عليكي حملي
وبتخانق لما تنصحيني
واتإمص لو عن أي شر تبعديني
لسه في ميعاد الصلاه بتفكريني
لسه جوايا تحدي
إنى أقدر في الطوفان زيك أعدي
نفسي أكون القلب الكبير
أسيع الكون ..
ودايما في مكان فاضي عندي
لسّانى آجي واعد جنب منك
واحكي ليكِ كل حاجه
وتزعقيلي..طب تصدقيني
مهما تقسي وتبعديني
ليكِ تاني ترجعيني
واروح لمين..ما إنتِ الوطن
مبشوفش روحي غير في عينك
لسه شبهك
لسه زى القمر..أبص لك
اتمنى في سنك اكون رسمك
لسه الناس تشوفني معاكِ
يقولوا دي أختك
ولسه يا أمي
مش لاقيه كلام أقوله عنك
غير إن أحلى ما فيا إني شبهك
..
قلـــم / وفـــاء صبـــرى
..........Wafaa Sabry.......
