جارى التحميل
استخدم زر ESC أو رجوع للعودة
يوميات حسين وفتحية
حلقة الشعر
=========================
مساء الخير ياعم حسين ياورد مفتح على الخدين
مساء النور ياست فتحية ياوردة الامة العربية
غريبة انك سهرانة بوردة حمرا وبلبانة
وفيها ايه يعنى يا بعلى ده انت بشحمك بترجع لى
شحومى ماشي يا فتحية يا بطة حلوة متغذية
لازم فى حاجة وعايزاها قوليها وانا روحى فداها
اه يا حسين ياابن تحية فكرتنى بالحب والحنية
انا نفسى ترجع زى زمان وتقول فى حبى اشكال والوان
انا شفت فيلم كده رومانسى حرك مشاعرى وزاد وجدى
وقلت ليه ماتقوليش شعر ده حتى يعنى ده بدون سعر
قصدك تقولى انى بخيل ده تمنه ارخص عندى كتير
مش قصدى يعنى ياعم حسين ده انت كلامك يملا العين
ايشمعنى يعنى جارتنا وداد وحسنية برضه ويا سعاد
بيسمعوا فى قصايد شعر من رجالتهم ويعنى بسعر
بتصدقى ده كلام وخلاص وبدون لا صدق ولااخلاص
ياعينى على حظى المنحوس ولا كلمة ولا حتى دبوس
ولا تزعلى شعر ودبوس يالا اشربى من البحر بكوز
قول لى يا جوزى وحبيبى وابن عمى وقريبى
يا عود ومدكوك فى الحلة يا طرب ضانى وكباب حلة
يا بطة طعمة ومحشية فى قلبى قاعدة وكلاويا
يا لحمة موزة مشفية خطفت عقلى من جمعية
يا عكاوى طاجن بالفتة وبدون شغت كلا البتة
جزار بيدبح فى الاشعار كفاية دى اللحمة عالنار
عقلك ياراجل كله فى اكل تغيظنى بيه وتسيب الشكل
حرمت اسمع شعر كمان منك واقفل ياعمى فى الدكان
شعرك ده حرك حصواتى ومرر فى كبدى وحياتى
مولوتوف بيحرق شعر كتير ممكن تحرر بيه فلسطين
يعنى اقتنعتى يا فتحية يا وردة بيضا وبرية
انا شعرى حاضر كده على طول ياخدوه ده رنة للمحمول
يا حمرا مجنونة يا قوطة فى سلطة خضرا ومحطوطة
كفاية صلصة يا عم حسين فقعتنى وتصبح على خير.
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون
