ياعصفورى ياللى هجرت ..!!
*****************
ياعصفورى .. ياللى هجرت ..
وسبت الحزن .. والصمت ..
وسبت ورودى دبلانة ..
وعريانة فى عز البرد ..
ومشتاقة لقطر نداك ..
بحنية يبوس الخد ..
وأنا اعمل أيه ف أشواقى ..
ولما النبض يشتد ..
ومين يمسح وجع قلبى ..
لما تزيد أهات الوجد ..
ياعصفورى .. ياللى هجرت ..!!
********
ياشارد ف الفضا وحدك ..
بأحزانك .. وتوهانك ..
وسبت البدر من بعدك ..
بيرمى الورد ف مكانك ..
أنا وهوه .. بهجرانك ..
قلوب موجوعة .. علشانك ..
ياعصفورى .. ياللى هجرت ..!!
********
وفين هتلاقى مرساك ..
ومين يفهم كلام قلبك ..
وساعة الشدة تلقاه ..
بحنية واقف جنبك ..
يشيل الحمل وياك ..
يداوى الجرح ويصاحبك ..
ياعصفورى .. ياللى هجرت ..!!
شعر
د. محسن الشرقاوى
