مايهمنيش بقلم / على مصطفى

ما يهمنيش :-
=======
انك خلاص سايب مراكبي
لوحدها من غير شراع
وبرغبتك مجدافي ضاع
عشان كمان اللى أشترى
هو نفس اللى افترى
وبسرعة باع
بلاش أمور الفبركة
بلاش صداع
=======
مايهمنيش
أصل الحكاية ما بتساويش
كل الوشوش ما يهماش
وما تختشيش
وقلوب تحب خلاص ما فيش
الناس خلاص اتحولت واتبدلت
أصل الوشوش
ماعدش فاضل غير أمل
وحبة رتوش
=======
ما يهمنيش
كل الكلام
هتقولى حب أو غرام
عشش فى بيتك يا حمام
بلاش لوع وبلاش ملام
بلاش تشجع فى الخصام
وابدأ حياتك بالسلام
توصل لغايتك والمرام
اهو ده الكلام
============
مايهمنيش
لحظة حنين
مستنياها من سنين
وقلبي كان منها حزين
راحت وسابت لى الأنين
والقلب أصبح مستكين
بين كاف ونون
ومافيش حنين
كله يهون
=====
ما يهمنيش
اللى أتصلب
لو كان له حق أو أتغلب
أو جه فى مقتل واتضرب
ما دام ضميرنا اللى أتخرب
أصحوا وفوقوا يا عرب
=============
ما يهمنيش كل القيود
ابنى وعلى فى الحدود
ماعدش دم فى الخدود
ووشوش مسيرها فى يوم لدود
اصحى وفوق الكل رايح للحود
واللى رحل عمره ما فى يوم
راح يعود
وارجع وشوف
فين الجدود
========
ما يهمنيش
إن السكوت يبقى له صوت
والصمت يخرج م التابوت
والسنط يطرح فرع توت
ما هو كل شيء لازم يفوت
واللى النهاردة بتولد
بكرة يموت

بقلمي ،،
على مصطفى ،،،
2/3/2015 م

·