**هى ثورة**شعر / أيمن صبري زنون أبوعماد**

هى ثورة !!
............
هى ثورة !! .. أيوه ثورة .. كان كلام عم ( أمين)
كان لُه بنت وواد كمان اسمه ( ياسين)
كان بيحلم بالعداله كان بيترجَّى السنين
كان بيحكى عن زمان لمَّا كانت مصر جنَّّه
لمَّا كانتْ للغلابه .. لمَّا كانت ليها شنَّه
لمَّا كان صوت المصانع ليها رنَّه
لمَّا كانت مصر رحمه بالغلابه
لمَّا كانت سجن غايم للديابه
لمَّا كان عم ( خليل) فيها حافظ للأمانه
لمَّا كان عم ( أمين) لسَّه فاكر الابتسامه
لمَّا كان النيل بيحلم يروى أرضه بالكرامه
لمَّا كان الليل يقابل ضى فجْرُه بابتسامه
لمَّا كان السَّد عالى يحمى أرضه م المهانه
هى ثورة !! .. أيوه ثورة .. كان كلام عم ( أمين)
كانت بلدنا لسه راجعه .. قايمه تترجَّى الحنين
قايمه تحضن الابتسامه .. تمحى دمعه م العنين
قايمه تتعكِّز كرامه .. شمس حالمه بيوم جديد
بعد طول الليل واخره راجعه لينا بشوق وليد
هى ثورة !! .. أيوه ثورة .. كان كلام عم ( أمين)
ثورة كانت ع اللى بايع .. واللى خاين ..
واللى كان باع الضمير
واللى كان طبَّال ومايع واللى كان أرجوز وديل
واللى قرد . ف مسرحيه .. واللى ربَّاته غذيَّه
وابن حاحه الفهلويه .. واللى خلَّى الكوره خَيَّه
واللى سرطن .. واللى خصخص ..
واللى خلَّى العيشه طين
تبقى ثوره .. أيوه ( عبله ) كان كلام عم (أمين)
بس تاهت ف الشوارع وف عيون الشقينين
لسَّه عاصيه .. أيوه (عبله) لسه بتعافر حنين
بس حاسس بالأمل إنه راجع للسنين
طول ماشمس الكون بتشرق وفيه إله اسمه الكريم
..................................................................
شعر / أيمن صبري زنون أبوعماد . صنصفط . منوف . مصر