******** مونولوج *********
وادى مراتى ياناس سعديه
جيبالى أكل فيه ميت لون
طبق باميه وطبق ملوخيه
وأنا تعبان عندى القولون
والله حرام عليكى ياوليه
مافيش مره زفر وحمام
بلاش مسبك ولاتقليه
باكولهم ومابعرفشى أنام
نفسى ف مره أكل مسلوق
لو كان حتى لسان عصفور
نفسى ف مره ياستى أدوق
وأحس ف بيتى عايش مستور
جنبى وجعنى حاسس بالزايده
شكلى بسببك هموت وفطيس
حاسس ببطنى بنار فيها قايده
شايفك قدامى شبه إبليس
كل يومين بتلفى ف محشى
وكل صباع زى النبوت
لاياستى أنا مسمحشى
بطنى خلاص هيطق وأموت
لو كان موتى سبب لجوازتى
أهل مرحب بالعزوبيه
مستعجله ليه بسى على جنازتى
غورى من وشى بقه ياوليه
مره طبليه ومره صينيه
إرسيلك مره بقه على حال
عليها سلطه وكام طعميه
صوتى ياختى وغطينى بشوال
إللى سعيد والله فى حياته
ربنا يكرمه مره فى جوازه
وإللى ربنا خيبه ف مراته
فرحه يوميها يقلب بجنازه
===================
الشاعر عيسى عبد الرؤوف
