((( بحبك يا بنت الآيه .. يا أجمل مدينه )))بقلم إيهاب الشابورى 30 – 12 - 2014

((( بحبك يا بنت الآيه .. يا أجمل مدينه )))

بحبك يا بلدى ياغاليه
و برفع راسى بحبك عاليه
بحبك يا بنت الآيه
يا أجمل مدينه
...................
بحبك بحر و قنال ..
و بحيره
بحبك يا صيف ..
مطير ضفيره
بحبك شتا .. و غنوه حزينـــه
...................
بحبك مينا الصيد ..
و مراكب
فوقيها رجاله ..
و حبايب
محمله .. فى موسم السردينا
...................
بحبك حمام أخضر
طاير لفوق
و ناوى يرجع للغيه .. بشوق
ياأحن قلب ..
بيطبطب علينا
...................
بحبك بازار ..
و سيبس و فنار
بحبك معديه بتهدى إنتظار
عشان فـ القنال
تعدى سفينـه
...................
بحبك ضظوى و كاستن
.. و سنجأ
بحبك نادى
و بيت ليه بنلجأ ..
لما الضلمه تغمى عنينا
...................
بحبك أوجينا و كسرى ..
و حميدى
بحبك يا عيدى
يا ساكنه وريدى
بحبك يا بنت اللذينا
...................
بحبك شبار مبطرخ جوابى
و رز مفلفل ..
و مسله وعرابى
ولمه حلوه ..
فـ فـريال الجنينه
...................
بحبك بمبوطى حدق ..
رجوله
بحبك ثورة عالظلم ..
و بطوله
بحبك كرامه ..
مزروعه فينـا
...................
بحبك أشتوم الجميل
وأم الخلول
بحبك بورفؤاد
من غير عزول
و سمسميه .. تغنى لينا
...................
بحبك كوبانيه ..
و تمشية فـ كسرى
و ريحة قهاوى .. لسه فاكره
مورهاوس بين إيدينــــا
...................
بحبك ثقافه .. و فن رصين
سمير العصفورى
و محمود ياسين
إشجينا بفنك إشجينـــــا
...................
بحبك إبداع .. و حبك إرتباط
و بحبك خط .. خضير الخطاط
لما بالديـوانى ..
يكتب أسامينا
...................
أقول فى حبك آيه و لا آيه
دا حبى ليكى ..
لو أوصف فيه
نموت إحنا ..
وما تخلص أغانينا
...................
إيهاب الشابورى 30 – 12 - 2014