أول مرة .......... الشاعر أبو عمارالمصرى

أول ....... مرة

***......***

ولأنك
أول حاجة
أقرب حاجة
آخر حاجة
وف عز الموت
تسألنى الدنيا
اطلب حضنك
مش عايز منك ولا حاجة
حضنك بس
شايفك واقفة
ما بين آخر دقات القلب
وآخر دمعة
وآخر ضحكة على شفايفى
وبآخر نظرة عليكى تدور
فين انت ؟
ولأنك انت
أنت وبس
خرجت شرايين القلب تعس
وتشوف ....وتحس
وشفايف
من غير شهد الريق
وطريق
بيسلم لطريق
خرجت كلمة
آخر كلمة
بحبك جداً
غمضت عينى على حدود صوتك
وحدود صورتك
رجع الشوق
لحياة وياكى
ثوانى معاكى
على أول درجات السلم
اللى اتعلم ....منا الشوق
أول مرة
ساعة لما عنيكى اتكسفت
أول مرة
رعشة إيدك
ضحكة سنك
قرب قلبى يبوس فى إديكى
قرب حبى يسمى عليكى
حضنك شوقى
حضنك قلبى
أول مرة
على أول درجات السلم
طول العمر ما بين أيامى
فرق كبير
لكن بين أول همسات الحب
وآخر همسة قبل الموت
عمر قصير...فرق صغير
لكن أسعد شئ فى الدنيا
لما تكون فى الدنيا حبيبتى
أول ..كلمة
آخر كلمة
باعشق عشقك
أحبك جدا
آخر صورة ف عينى معايا
صورتك انت
حتى اللمسة يا منية عينى
آخر لمسة
ألمسك انت
واسترجع لحظة إحساس
أوى وحشانى
لما لمستك
أول مرة
بــقــــلـــــم ا لـــشـــــا عـــــــــر
أ بــــو عــــمـــــــــا ر ا لــــمــــــصـــــــــــــر ى