اضحكى عشان الصورة
.............................
عيشى حياتك استمتعى بيومك
لا تخلى ماضى يحطمك ولا مستقبل يقلقك
كفايه الصراع اللى عشتيه
بين ايام راحت عذبتك و ايام جايه خوّفتك
و خليتى الاحزان سحبتك فى متاهه النسيان
ياما داستك اقدام و ياما رفعتك اوهام
اتقطّعتى حتت من الطيب و من الشرير
و ياما حزنتى على وجع الغير
و اللى قتلك و حطم ذاتك انك اتعايشتى مع مأساتك
و سلمتى ان ده قدرك و هى دى حياتك
كفايه بقى انفضى الهم عن كتافك
و ارجعى تانى للحياه اتنفسى عبيرك
و اتحركى برشاقه زى الفراشه
و اتباهى بجمال الوانك
و خلى الحنان تانى يلف دراعاته عليكى
ياخدك فى حضنه و تبقى انتى عنوانه
صحصحى قلبك و انكتيه من احزانه
و ارجعى تانى لخيالك
و اطلعى فوق السحاب و انثرى عبيرك
ينزل زى المطر ع الارض البكر يحييها
و ينبّت الزرع فيها
و تدب الحياه فيكى و ف كل المعموره
اصل انتى انثى اسطوره
ممكن تضحكى بقى عشان الصوره ؟
.................
عزة الشربينى
