حزن سنبل / بقلم الكاتب / خضير الحسني

أجه راس السنه وصفناتي مشتعلات...
وعيون المرايه دموعهه بخدي....
تقك شباج عمري الراح وأطشر ورك صفصاف
على رموش المدينه التضحك بسدي....
تحن غفله...
وتون بسكوت...
تشاورني وسمعهه الكل...
أجاك الليل وأحلامك ألف تابوت...
خرسه الثغبت وداعه...
تريد الكتل عمرك ذاك
تاني وياي بس ساعه...
يجي لابس ثياب البيض
وتزفه النوارس فوك وجه الماي...
طوله اشراع...
وانته سنين ثارك دمعه الشاطي
الما خطوة فرح رسمت على الكيعان مشيتهه
لاذبت نكاب الخوف
تجاعيد االسنين طيوف
ظلمه بكصه الصنطه...
جبير العمر شيكمطه . 
مامش سمل راي بتالي هذا الليل
والسفان صفنة ذل...
حزن يكتل...
ربيع الشوك...
ويخضر مناجل تذبح السنبل...
ياراس السنه المهيوب
ماظل بيه لهفه الما صبغهه الشيب...
خريف متاني جيتك...
وانته رايح وين....
يالشايل ربيع أشبيك ماتندل....