![](http://us.i1.yimg.com/us.yimg.com/i/us/pim/el/spc_eee1.gif)
![](http://us.i1.yimg.com/us.yimg.com/i/us/pim/el/spc_eee1.gif)
جلست سعاد تتابع المسلسل العربى وفى يدها جوارب خالد ترتقها وكأنها لاتريد ان تجلس بلا عمل .... كانت عيناها مثبتة على التليفزيون وقسمات وجهها تتغير مع تغير المشاهد من ابتسام الى حزن الى مصمصة الشفاة على حال الدنيا ..... الى الدعاء على الازواج المفتريين ..... فيرمقها زوجها بنظرة مداعبة من تحت الجريدة التى يقرأها فتسارع بالقول : اللى فى التمثيلية بس يا أبو خالد !!
ثم تبحث عن سلمى فلا تجدها بجوارها ثم تجدها فى البلكونة وحيدة تطالع المارة فتنادى عليها : تعالى ياسمسمة اتفرجى معانا دى الحلقة النهاردة حلوة اوى !!
فترد سلمى بلا اهتمام : ( حلوة ايه بس ياماما ده البطل بقاله 5 حلقات بيطلع فى الروح ولسه ما ماتش .... هو انا ناقصة خنقة ؟ )
فمصمصت شفتاها وقالت لها ( انتى كده مالكيش فى الطيب نصيب ده البطل عامل عمايل وهو بيموت !! طيب تعالى اعملى لنا كوبايتين شاى انا وابوكى .....)
فذهبت سلمى الى المطبخ لعمل الشاى ففوجئت بملك تخرج من غرفتها كالصاروخ وتترك واجبها بالطبع لتقول لها ( وانا كمان اعملى لى كوباية شاى يا أبلة سلمى احسن دماغى اتقلبت خالص من الواجب وعمايله ....... بس سكر كتير الله يكرمك !!)
وقبل ان ترد سلمى سمعت هدير صوت أمها وهى تكاد تأكل ملك بأسنانها ( شاى ايه اللى عاوزة تشربيه يا مقصوفة الرقبة ؟ ادخلى يا هانم كملى واجب الحساب قبل ما أقوم لك !!)
فجريت ملك على غرفتها وهى تبرطم بكلمات غير مفهومة عن السكن على كوكب المريخ !!!
فابتسم الاب من خلف نظارته الطبية وقال لزوجته : ياشيخة حرام عليكى كنتى سيبيها تتفرج على التمثيلية شوية !!
فردت بامتعاض : تمثيلية ايه بس؟ والله انك طيب.... دى طول النهار من ساعة ما رجعت من المدرسة وهى بتلعب على الكومبيوتر بتاع أخوها ولازقة فى التليفزيون ورامية الواجب لحد قبل ما تنام بساعة .... ويقعد الهم لىَّ أنا !!
فصمت الاب كعلامة على استسلامه ثم نظر الى ساعته فوجدها تقارب التاسعة فسألها بقلق : هو الواد خالد اتأخر كده ليه ؟ ده ما رجعش من الساعة 3 من بعد ما اتغدى على طول ؟!!
فمصمصت شفاها وردت باشفاق : عينى عليه يا حبيبى مموت نفسه فى الدروس الخصوصية والمذاكرة ....... ادعى له يا ابو خالد الله يكرمك !!
فرد بسخط : والله انتى اللى مدلعة الواد ده علشان الوحيد ..... مش فاهم يعنى ايه دروس فى كل المواد ليه يعنى ؟ ح يسقوا له العلم فى كوباية ؟
فردت بدهشة : هو احنا بس اللى كده ؟ ما كل الدنيا على ده الحال ..... كل الناس بتاخد دروس فى كل المواد فى الثانوية العامة ....... ده فيه كمان اهالى بيدوا فى المادة الواحدة درسين استاذ يشرح كويس والثانى بيحل مسائل ويراجع كويس !!
فأجاب بحنق بالغ : والله العظيم الدلع ده هو اللى ح يضيع الولد ده ..... يعنى نبيع اللى ورانا وندخل بمرتبنا كله جمعيات علشان البيه ما يتعبش نفسه فى مادة ولا مادتين ويذاكرهم لوحده ؟
وعاوزاه يطلع بعد كده راجل ؟ اذا كان مش حاسس اصلا قد ايه احنا بنموت نفسنا ونحرم روحنا من كل حاجة علشان فلوس الدروس الخصوصية بتاعة الباشا ...... وياريته حاسس بكده لا ده طول الليل عامل نفسه بيذاكر وهو قاعد على الكومبيوتر ما اعرفش بيعمل ايه .... والله حرام النار اللى مكويين بيها دى !!
فزفرت باستسلام وهى تقول : عندك حق والله انا مش عارفة فلوس الجمعيات دى ح تخلص امتى – ده حتى فلوس الجهاز اللى كنت بأشيلها لسلمى كل شهر – مش عارفة اشيل لها حاجة من فترة ..... بس معلش ان شاء الله ييجى بفايدة ويجيب مجموع حلو يفرحنا ان شاء الله ......
فأجاب بصدق : هو انا يا سعاد ح أستخسر فى ابنى ؟ انا نفسى اشوفه احسن واحد فى الدنيا كلها .... بس اللى مزعلنى اننا زمان كنا بنشيل هَم اهالينا ح يدفعوا مصاريفنا ازاى لكن دلوقتى الانانية بقت هى الاساس ..... الابن مالوش دعوة اهله يجيبوا له الفلوس منين ؟ المهم انه ياخد دروس فى كل المواد حتى لو مش محتاج لها والمهم انه يجيب لبس عجيب زى اللى أصحابه لابسينه ويجيب احدث السيديهات والشرايط ويخرج ياكل فى المطعم الفلانى ويدخل السينما الفلانية مع الشلة والا ح يبقى ابوه دقة قديمة ومش عاوزه يبقى زى اصحابه ............ .
فردت باستسلام : ح نعمل ايه يا ابو خالد هو زمانهم كده ......
ثم ضحكت لتلطيف الجو وقالت : انت اللى الظاهر عجزت علشان كده زعلان من الشباب ...... ح ناخد زماننا وزمن غيرنا ؟
فلانت ملامحه وابتسم : ماشى يا ستى انا عجزت بس انتى ما شاء الله عليكى كل سنة بتبقى احلى من اللى قبلها !!
فاحمروجهها وأرضاها اطراء زوجها لها وقالت بخجل : (بس بقى يا ابو خالد سلمى تسمعنا !)
ففوجئت بسلمى ممسكة صينية الشاى وهى تضحك وتقول : ( انا هنا من الصبح يا جميل .... ولو عاوزانى اروح اجيب مشبِّك من دمياط وارجع بكرة انا تحت امرك !!)
بقلم : أم سما وحلا
ساحة النقاش