خرم ابره
*********
شال الحنين 
اللي اشتريته
مجاش مقاسك ...؟؟!!
ما انتي اللي عنيكي
حابه تشوف
من خرم ابره..!!؟
درويش هواكي
اللي صمد
ف العهر ناسك
زعلانه ليه
دلوقتي 
ان مشاعره كافره
كنتي الصنم
اللي اتعبد
من غير مقام.....
كنتي الولي
من غير حيل
ولا معجزه
كنتي الحقيقه 
الملغزه
دعوه ف عيون
بتبكي دم
والريق بيجري
كأنه سم
كنتي ف خضم
التوهه ضمه
بتنذري
بريحة شياط
وتغرزي ضافرك
ف روحي
وتأمريني بالثبات
ولما جف
الحلق هم
كفر المتيم بالصنم
:
ضل الوجع 
معادش واضح
ف انعكاسه
بوح الفؤاد
معادش جارح
ف انتكاسه
سألني قلبي
وهوه كاره 
لاحتراسه
الحب ممكن
ينتهي؟
ينهزم ...؟
قلت ....
ممكن يتفرم
يترمي ....
تحت الجزم
لو قتل....
ف الحلم ناسه....!!!
:
دلوقتي شايفك
بعين محايده
وقلب كاشف
عريانه من 
كل الزخارف 
وقعو الجناحات
من جنابك
منتيش ملاااااك...!!!
دلوقتي كاشفك
تركيبه هشه
وضي باهت
ممسوخه من
كل الزوايا
مبتوره لحظة
انسحابك
والاشتباك
:
وحده النبي
اللي ف جيوبه
المعجزه
وانا مش نبي...!
ولا ده زمان
المعجزات
وحده الغبي
اللي بيستحلى
الأذى 
وانا مش غبي
ولا قلبي حصالة 
اهاااات
العشق مات...!!!!
*************
هشام ابراهيم
28/7/2016