مريض نفسي
صباح الخير يادكتوري
صباحك نور وفرح وسعد
ومايكتب عليك البعد
ولا الحرمان من الاحباب
ولا الاصحاب/ولا اللمه
ولا احساس صدي الضمه
انا المرضان بحب الناس
وخوفي تملي م الوحده
بعدي كتير لكل الناس
وغيري ماسك لي ع الواحده
انا التايه ف قعدتهم
وحيد انا وسط لمتهم
دموع زايفه/كلام خداع
كرهت انا كدب ضحكتهم
محسيتش الامان بينهم
لكني صبرت لافقدهم
فصبحوا كل شئ عندي
وانا ولا شئ ف دنيتهم
انا جيتلك عشان احكي
واقولك ربما تفيدني
انا حبي الكبير للناس
مكتفني/ ومقيدني
لكن دلوقت......
ودلوقتي بمرور الوقت:-
بقت مش حابب اتقابل مع الاشخاص
ولا عاوز اشوف الناس ولا اتكلم
واديني وحيد عايش وخلاص
ومرتاح بس بتالم/وببكي حنين
يمر يومين/ ويوحشني الصحاب جدا
واحن لقعدتي معاهم علي القهوه
قلم بهزار جه علي سهوه وانا سرحان
واحن كمان/لشاي جه سكره زياده
وانا اصلا مليش ف الحلو كالعاده
وبشربها عشان خايف من التحفيل
وتريقة الصحاب/ والضحك والتهليل
صبحت بخاف/ مبالغه ف تعبيرات الوش
وقلبي عبوس/ ف ضحكه بخيل
اقولك شئ غريب جدا...:-
انا محكيتش من سنتين ولا كلمه
ولا فضفضت مع غيرك ولا اتبسمت
ولكن ضوئك الخافت/ ومزيكتك
وكرسيك اللي بيهز المشاعر هز
فسرسبت الكلام مني/ صبح بينز
وبيسيل زي دم ف جرح شكله عميق
واسراف ف الفرح من بعد عام م الضيق
وجوك ده اللي خلاني صبحت جرئ
وقولت علي اللي جوايا كطفل برئ
مشاعري ملخبطه جدا..
بعاني كتير من الوحده اذا بشتاق
واعاني ف وسط لمتهم...
اذا نافقوا/ وشوفت رياء
ياريت توصفلي شي ينفع يعوضني
عن الراحه اللي غابت عني من فتره
كمزيكا/ حقن ماشي/وبرشام حتي اوقطره
تطلع كل شئ مدفون.....
واصيح يسمعني كل الكون
واضحك جد/ مااخاف من حد
ولو هيقولوا واد مجنون...
انا مشتاق ومن فتره
اجري كطفل ف المطره
ف اول جلسه ف عيادتك
انا مرتاح/وجزء كبير ف ألمي راح
عشان فضفضت....
ومش ندمان علي الخطوه اني جيت عندك
ومش فارقه...!!!
سواء كان صح/سواء ف الخطوه ديا غلطت
‫#‏الجلسه_الاولي‬
‫#‏نبيل_شفيق‬