غمضت عنيك
وطفيت النور
قررت تنام
مستنى تشوف بكرة الاحلى
من جرح الامس وايامنا
ونسيت تغسل فنجال القهوة
مستنى تشوف اشكال ورموز
او قلب بسهم جوة
القهوة
قررت تكون مقتول
فى منامك
حابس فى دلابك
احلامك
مستنى بشفرة تشوف النور
اعمى
هتشوف ازاى لو كل الشمش
قدامك
ضميت الوحدة بأحضانك
مجنون بيطبطب على نفسة
علشان نفسة
عايشة عشانك
قوم واضحك لمرايا
قصاد باب الشقه
كلم احزانك وواسيها
واصرخ للدمعه
قولها لا
غمضت عنيك
وطفيت النور
قررت تنام
وتكون قصة بطلها
البسمة والحب ضمير
بس استنى
مستعجل ليه
نسيت فعلا اكلم نفسى
واقول ليا
تصبح على خير
سعد محمد سعد