حالة روح
**********
الخطوه وصلت
لحد نقطة صفر
السلم بيطلع
وحده للنازل
قلبي اللي آمن
لحد اخر الكفر
واقف ف قبح
الحلم بيغازل
ده مش تضاد
بيبين المعنى
ولا خرف
من حرف مات 
مقتول 
ولا مجاز 
بيزوق المغنى
لسميعه طرشه
نصها مسطول
دي حالة روح
واققه بتتهافت
حالمه بتتعشم
ف ضيها الخافت
يحميها ف دروب
العبث والكدب
يطمن روحها
لو ف يوم خافت 
مسنوده كف
الحنين
على جدار مايل
جوف الحقيقه
مسدود بحصو الملح
الارض عطش
السنين
والمطر غافل
خرس الندا
ماتت بذور القمح
كل الوشوش
بهتانه ف الصوره
والذكرى نكره
مجهوله مبتوره
كم من عيون
بعد العمى تفتح
وتشوف مداها
ديابه مسعوره
:
صوت العصافير 
وشوشه 
بتنخر ف جسد الحلم
والصبح خارج
عارج 
مكفي ع الطرقات
صفحات الكتب
خربشه
ريحتها ريحة الدم
والحرف هاجج
ناهج
بينشد المساحات 
:
اللمسه 
صارت وجع
والنظره 
صارت وجع
والحلم بنت
عجوز
معادش فيها 
الطمع 
والجسد عاري
ف كل لحظة
يخور
والروح دواها
النور
والنور ضرير
البدن
مكتفاه عتمه
ف توب 
كأنه كفن
ضامه 100 ضمه
مع انه لسه
مماتش
لكنه بينازع
اهته امل 
مهزوم
راحل ومش راجع
هاجم عليه 
اليأس
من 500 شارع...!!!!
************
هشام ابراهيم
8/7/2016