جارى التحميل
استخدم زر ESC أو رجوع للعودة
- #تاريخ الأمس
ضحكة بريئة.....
وخطوة لسه مرعوشة
وحلم لسه بينبت
خضار محصور......
في وسط طابور
حاجز دوره ومتبت
وكلمة وسطر......
سرينة قطر
مستعجل....
إللي ميعاده متأخر ......
وناوي علي الرحيل
يبدآ
شجرة أول عمرها تورق
في وسط الصخر
وقسوة صخرنا تموت......
موجة حلمها تكبر ف وسط أمواج
في قلب البحر
قبس مكبوت.......
ونفسه يندمج في النور
ويحلق
و أنا قليبي وسط الكل
لسه باقي ع العشرة
يغمض عينه ما يفتح
يخاف للذكريات تهرب
فيدفس بكرة في أمسه
وبهمسه
يهدهد روحه ويصبر
يدادي ف إللي متقدر
ويفرد جناحته و يجرب
يضرب في الهوا مرات
ساعة يحس بإنه خلاص يقدر
وساعات أكتر من يأسه
يقول إصبر
ويجمع صوره إللي إتقطعت في إيديه
ويلزقها
يصورها تاني جوه عنيه
ويدندن......
بكل الهمس
هيعيش بكره كالمعتاد
و متدون علي حلمه
بتاريخ الأمس
#محمد_صبري
