بحبك
...........
بحبك حب فاق الحب وزياده
بحبك حب مش واجب ولا عاده
بحبك فوق حدود الكون
بحبك شايله غصن زيتون 
شجر طارح بطعم الشهد تكوينه
بحبك فرحة العاشقين بخاتم 
حتى لو عيره
واشوفك جوة أصغر بنت بضفيره 
بحبك طفل خاف من بدلة العسكر
ركع قدامه ميت عسكر 
وباسوا الأيد
فقام يهتف
تعيشى يا فرحتي بالعيد
بحبك عسكرى واقف 
بيرفع علمه ع آل سارى 
تجرى دموعه على خده
تعيش الرايه مرفوعه
ويفدى الرايه الف شهيد
بحبك شاب اهو ماشى 
وشاف الغدر وسلاحه
ب يرصد ابنك أبو نجمه
فقام يجرى ويحضن طلقة الغدار
يبدل ليله الف نهار
بحبك نار بتاكل عرش أعدائك 
تسوى اللقمه لعيالك
بحبك حضن ميفرق 
وجامع كل أولادك
بحبك بس مش بعرف اغنيلك
ولا بعرف اقول هرمك ولا نيلك
لكن بأعرف اهد جدار 
مفرق بين محبينك
وابنى بيتك العالى 
وأضحى بكل شيء غالى 
عشان خاطرك
لكن خايف 
أضحى فيطلع الكداب 
يقول انى يا أمى عميل
وأنى بعت يوم أرضك 
وبعت النيل
وبعت المركبة الواقفة 
فى مية بحرك الأحمر
وبعشق لونك الأخضر 
بحبك صحفى قام يصرخ 
فى عز الليل 
رافض ذلك... 
رافض بيعك
فقالوا انه واد أصفر
بحبك ومهما يقولوا عن حبى
عمرى يا غالية ما اتاثر 
منصور عبد المقصود