نفسى بقلم ابراهيم فهمى

نفسى
!!!!!!!!!!!!

نفسى أفرح فرحه غايبه من زمانْ

نفسى ف كلمة حب صافيه 

نفسى شلاّل من حنان

نفسى حد يخاف عليّا

نفسى حد يقول عينيا

نفسى حد ياخدنى مره

جوّه بستان الأمان

نفسى ايد تمسح دموعى

نفسى لو طفْيت شموعى

حد يقيد لى نور جديد

هو ليه طعم الحياه دايماً مرار؟

كل فرحه بتتولد تطّخ نار

حتى أحلامنا القديمه

لسّه فى دولاب الانتظار

ايه هيحصل لو ف يوم

بدل الغيوم نزل المطر؟

وارتوت أرض العطاشى

والشوارع والشجر

هى ليه ناشفه القلوب؟

همّا خلّوا القلب طوب؟

مش غريبه انك بتضحك

والعينين فيها الدموع؟

مش غريبه تقول لى عايش

وشمس حلمك 

رافضه تطوع؟

لو فاهمنى تعالى جنبى

وابكى ع الأيام معايا

عشنا دنيتنا حيارى

ضاعت الخطوه ف طريقنا

ولسّه أحلامنا ف بدايه ،،،،،،،

بقلم / ابراهيم فهمى المحامى

17/11/2014