حلم عمرى للشاعر رضا ابو الغيط

حلم عمرى

الحلم تاه من بين ايدينا
واحنا لسه بنحلمه
الدموع اللى ف عينينا
جوا منا اتألموا
لما شافوا الشمس غابت بالنهار
لما طل الليل علينا ف إنكسار
لما قالوا الجنه فيكى
وإلتقينا الجنه نار
فين هلاقى الحلم تانى
والزمان مبقاش زمانى
والدموع اللى ف عيونى
عشانك انتى مش عشانى
جوا قلبى كان مكانك
والحلم كان مخلوق عشانك
ضعتى منى غصب عنى
يا اللى كنتى حته منى
كنتى حلمى اللى ف خيالى
كنت فرحى وكنتى همى
بعد منك يا حبيبتى
هقول لمين غيرك يا أمى
لما كنا ف الميدان
كنت ساكن حضنك انتى
كنت حاسس بالأمان
كنتى دمى اللى ف عروقى
صوتك انتى كان أدان
رحتى فين يا حلم عمرى
ولا راح فين الميدان
حلم عمرى يا حبيبتى
ان أجيب حقك انتى
م اللى باع واللى خان

كلمات / رضا أبو الغيط