الحلو بالاغاني القديمة طبعا انه اكثرها غنيت على قصص حب حقيقية، وتعرفون طبعا حب اهل قبل شلون چان صادق وجياش، يعني اذ سمعت أغنية وإنت تعرف قصتها أو على الأقل على منو وليش غنيت اكيد راح تكون أحلى وإلها طعم ثاني.

إليكم أغنية (الريل وحمد للفنان الكبير ياس خضر)، الريل هي القطار بالعامية من أصلها الانجليزي (بس ...هذي الاغنية كتبها الشاعر الكبير (مظفر النواب)  لقصة حقيقية عن لسان فتاة من أهل الجنوب و تحديدا تسكن منطقة (الاهوار)، قصة هذه الفتاة تبتدي بحب شاب من قريتها وبعد أن تطورت العلاقة بينهما، ووفقا للتقاليد والأعراف العشائرية العراقية قرر أهلها قتلها حتى يتخلصوا من العار الذي أصابهم، وفي إحدى الليالي أخذوها بالقطار حتى يبتعدوا عن المنطقة ويقتلوها بعيداً عن الأنظار، فصادف بالطريق ان مروا على مَضيف حبيب هذه البنت  (حمد) فلما انتبهت لهذا الأمر وسمعت كلامهم وصوت دگ الگهوة التي كانوا يقدموها بالمضيف بدأت تنشد هذه القصيدة، والتي تبتديها ب(مرينا بيكم حمد وإحنا بقطار الليل واسمعنا دگ اگهوة وشمينا ريحة هيل) وتنتقل لمخاطبة القطار وتطلب منه أنه يمشي ببطء حتى تظل أطول فترة ممكنة بقرب حبيبها بحجة أنها خايفة من القطار لايكعد السمك ( الكطه ) الي عايش تحت (حدر) السنابل من النوم وتكله (ياريل صيح بقهر صيحة عشك ياريل....هودر هواهم ولك حدر السنابل كطة). تستمر بمخاطبتها القطار لأن ماعدها شخص آخر تحچي وياه عن قصتها، وتبدي تشكيلة من حبها اللي طلع چذاب (دغش) وحبيبها اللي تركها تتحمل ثمن حبهم لوحدها طول العمر (ياريل طلعوا دغش والعشگ چذابي، دك بيه كل العمر مايطفة عطابي، تتوالف وية الدرب وترابك ترابي، هودر هواهم ولك حدر السنابل كطة ). وبرغم العذاب اللي حملته، ترجع تحن لحبيبها وتسولف للقطار عنه وعن خوفها الدائم (انه أرد الوك لحمد مالوكن لغيره، يجفلني برد الشتا وتلجلج الليرة، ياريل بأول زغرته لعبته طفيرة، هودر هواهم ولك حدر السنابل كطة)

القصيدة

مرّينه بيكم حمد , واحنه ابقطار الليل واسمعنه , دك اكهوه ...

وشمينة ريحة هيل يا ريل ...

صيح ابقهر ...

صيحة عشك , يا ريل  هودر هواهم , ولك ,

حدر السنابل كطه

يا بو محابس شذر، يلشاد خزامات

يا ريل بللّه .. ابتغنج

من تجزي بأم شامات

ولا تمشي .. مشية هجر ...

گلبي..

بعد مآ مات

وهودر هواهم

ولك

حدر السنابل كطه

جيزي المحطة..

بحزن ..

وونين ..

يفراگين

ما ونسونه، ابعشگهم...

عيب تتونسين

يآ ريل

چيّم حزن...

أهل الهوى امجيمين

وهودر هواهم

ولك

حدر السنابل كطه

يآ ريل

طلعوا دغش...

والعشگ چذابي

دك بيّه كل العمر...

ما بطفه عطابي

تتوالف ويه الدرب

وترابك ..

ترابي

وهودر هواهم

ولك..

حدر السنابل كطه

آنه ارد الوك الحمد .. ما لوكن لغيره

يجفّلني برد الصبح ..

وتلجلج الليره

يا ريل بأول زغرته...

لعبته طفيره

وهودر هواهم

ولك .. حدر السنابل كطه

جن حمد....

فضة عرس

جن حمد نركيله

مدكك بي الشذر

ومشلّه اشليله

يا ريل....

ثكل يبويه..

وخل أناغي بحزن منغه...

ويحن الكطه

كضبة دفو، يا نهد

لملمك ... برد الصبح

ويرجنك فراكين الهوه ... يا سرح

يا ريل....

لا.. لا تفزّزهن

تهيج الجرح

خليهن يهودرن..

حدر الحراير كطه

جن كذلتك...

والشمس...

والهوة...

هلهوله

شلايل برسيم...

والبرسيم إله سوله

واذري ذهب يا مشط

يلخلك...اشطوله !

بطول الشعر ...

والهوى البارد....

ينيم الكطه

تو العيون امتلن ....

ضحچات ... وسواليف

ونهودي زمّن...

والطيور الزغيره...

تزيف

يآ ريل ...

سيّس هوانه

وما إله مجاذيف

وهودر هواهم

ولك...

حدر السنابل كطه

(منقول بتصرف )