وبعدين معاكي يا دنيا***إنتي رايحة بينا علي فين
وعلي فين موديانا *** وإيه حكايتك معانا
وفي حالنا مش سايبانا * هنلاقيها منين واللا منين
عايزة تمشينا ع هواكي**والحكاية مش نقصاكي
داحنا جيبنا اخرنا معاكي** والكيل طفح من سنين
بتدوسي علي الغلابة*** وبتعليي في الديابة
وجواكي أصبح غابة *** فيها الوحوش سايدين
بتذلي ف إبن الأصول** وبتيجي عليه علطول
سداها عرض وطول ** وبترزعيه شمال ويمين
ولاد الحلال قلو فيكي**وولاد الحرام طمعوا فيكي
وكل ده بصنع إيديكي**قوليلنا عمايلك ترضي مين
الناس فيكي بتكح تراب**وحياتهم قلبت لهباب
ماتشيلي إيدك من ع الشباب**اللي معظمهم ضايعين
اللي بيدور علي وظيفه **لو حتي بتلاته تعريفه
وحالتهم أصلا ضعيفه ** وفلوس للجواز مش لاقيين
واللي عايز يسافر يتغرب** يطفش بره عشان يتهرب
واللي بيتظاهر ويخرب **واللي إنضم للإرهابيين
واللي مقضيها إنترنت ** وكل يوم يعرف كام بت
وعقله خلاص قرب يشت**وسكته كلها نساوين
واللي بيشرب حشيش وخمره**ودماغه عايزالها عمره
وكل يوم يعمل كام نمره *** ويفرج عليه البني آدمين
واللي معاه شهادة نهائية*** دبلوم أو معهد أو كلية
متلقح ع القهوة للصبحية ** ماهو مش لاقي شغلانة المسكين
والبنات كترت كتر الخوف** والعنوسه حواليهم بتطوف
وعددهم زاد ملايين ويا خوف ** يتصرفوا ع بطايق التموين
والارامل والمطلقات *********والغارمين والغارمات
كل يوم بيزيدوا ف الفضائيات** وأفلام السبكي وشاهين
ونارك يا دنيا لهيبها كابس *** وبتاكل الأخضر واليابس
وإحنا نقول حابس حابس** وفعلك من فعل الشياطين
وبعدين معاكي يا دنيا ***** حتودينا علي فين
