كان ياما كان فى سابق العصر والآوان كان فى ناس صالحين الكل شايفهم كده قالوا عايزين نعمل خير لله ، ومفيش أحسن من الخير اللى ربنا يقبله غير كفالة اليتيم رسولنا الكريم قال كده : " أنا وكافل اليتيم كهاتين فى الجنة وأشار بأصبعهما السبابة والوسطى " وابتدا المشوار 10/6/1995 وابتدناه ازاى بقى قالوا هنكفل أطفال أيتام فى بيتهم " منبتهم الطبيعى " وهنقبل أطفال محرومين من الأب والأم وياما استقبلوا أطفال وتولوهم بالرعاية الشاملة وبالانفاق ، وياما خرجوا من عندهم أطفال وراحوا لأسر بديلة وبعد كده قالوا هنغير اللايحة الداخلية ومش هنخلى حد ياخد أطفال لأسر بديلة نظرا للألم النفسى اللى كان بيصيب مديرة الدار والعاملين فيه نتيجة تسلمها طفل لأسرة أخرى – لأنه بمثابة ابنها حته منها – وقالوا احنا هنكتفى بالموجودين وهنكبرهم لحد سن الثامنة عشر سنة وبالفعل بنوا مبنى جديد وحصلوا على التراخيص لحد كده كويس وكتر من خيركوا ويجعلوا فى ميزان حسناتكوا ، وما أكتر الطيبون المحبين لفعل الخير والتبرعات . لكن يحدث أمر ما فى نفس ابن يعقوب ، نفسه حدثته بشئ ما فجأة احنا مش عايزين الاطفال دوووووول هنوزعهم ، هنشتتهم ، مبقوش يلزمونا !!!!!!!!!!!!!

- ليه بس ياحاج ايه اللى حصل ؟

- اللايحة بتقول من سن يوم لحد 6 سنوات.

 - نعم !!!!!!!!!!! طب ما الايحة قالت أن الاطفال هتفضل فى مؤسسة تابعة لنفس الجمعية وكمان هنعمل دار استضافة لمن تعدى 18 سنة بالنسبة للصبيان أمال احنا خدنا تراخيص لإيه ؟ وبنينا المبنى الجديد عشان ايه ؟

- محصلش ، وبعدين احنا متكفلين ب 500 طفل فى منبتهم الطبيعى ، ومعدناش قادرين نصرف عليهم خلاص ، ثم احنا خايفين من المسئولية الجنائية لو حصل حاجة معاشتنا كلها هتتوقف ، تجارتنا وأعمالنا ممكن تتأثر .

- استهدى بالله كده وخلينا نتكلم بالعقل صرف ايه بس ياحاج اللى أنت بتصرفوا أطفال الدار دول حياتهم اليومية من مأكل ومشرب وحلويات وبونبونى ، وملبس ومصاريف مدارس ولبس مدارس ، وفسح كلها تبرعات يعنى مفيش حاجة خارجة لهم من ميزانية الجمعية ، ثم مسئولية جنائية ايه ياحاج دا العيال دلوقتى – اللى أنت متعرفش أساميهم – بيصوموا النوافل وبيبقوا سعدا جدا بوقت السحور وتجهيز الإفطار ( صيام عاشوراء – ليلة النصف من شعبان ) ، دا أنت لو متابع دا فيه طفل بيحرص على صلاة الفجر مع الأم المسئولة عنه كل لما تقوم للصلاة ، دا كل جمعة بيخرجوا لصلاة الجمعة فى المسجد .

بيضايقك صوتهم العالى فى مكان حركتهم الكتيره دى شقاوة عيال طبيعية خصوصا وانك بتخرجهم قليل عشان مسئوليتك الجنائية ، ياحاج دا لو ابنك ومغلبك أو عاصيك هتصبر عليه لأنه ضلعك هتعمل فيه إيه هتقطعه!!

- خلاص الموضوع انتهى واللى نعوزه هو اللى هنمشيه بأى طريقة تقابلنا هنمشيهم يعنى هنمشيهم وهنجيب مكانهم رضع. خلص الكلام

- لاإله إلا الله بأى طريقة ياحاج للدرجة دى مش طايقهم بأى طريقة !! يعنى لو وصلت للرشوة معندكش مشكلة ، لو وصلت لتلفيق التهم عادى بالنسبة لك ، ولا يمكن تقصد عشان ما لقيت صرفه للمبنى الجديد وهتعرف تستفيد بيه ازاى

طب سيبك من دا كله أرحم قلب أمهم (المديرة) المكلوم بالألم معذوره ياعينى أصل العيال دى كانت بالنسبة لكوا شغل وعمل خير ، وعمل الخير دا دلوقتى ميلدش عليكوا فنعمل خير بطريقة تانية لكن هى كانوا ولادها فعلا أدتلهم من عمرها وصحتها ، طب حتى أرحم العيال نفسها 8 سنين ياولداه وهما عارفين أن دا بيتهم وليهم أب وأم وصدقوا فعلا وآمنوا ، تيجى أنت بكل بساطة روحوا مكان تانى طب ليه ؟ وعشان إيه ؟ طب ماما وبابا هيجوا معانا ؟ ما كفاية عليه مصيره اللى هو مخترهوش أتقى دعوته عليك ياجدو .. صح كده مش كان بيقولك ياجدو

بص بقى مادام خلص الكلام زى ما بتقول ، هتكلم مع حد تانى كلامى دلوقتى موجه للسيده / غادة والى وزيرة التضامن الاجتماعى جايز تسمعنى قبل ما توصلولاها بأى طريقة كانت زى مابتقولوا وتاخدوا منها توقيع بالموافقة على تشريد العيال من بيتهم.

السيده / غادة والى اللى قلبت الدنيا رأسا على عقب فور علمها بسوء الخدمة وسوء معاملة الاطفال فى دار قناة السويس لمجرد تقديم الطعام للأطفال بطريقة غير آدمية ، وأرسلت لجان لتقصى الحقائق وقمت بمحاسبة كل شخص فى هذا المكان على تقصيره . أوصيك بأطفال تلك الدار خيرا ، ضع مستقبلهم ومصيرهم ونفسيتهم نصب عينيك لا ترى سواهم وكونى لهم خير ناصرا

 

 

  • Currently 0/5 Stars.
  • 1 2 3 4 5
0 تصويتات / 37 مشاهدة

ساحة النقاش

tulipe

tulipe
IDB »
جارى التحميل

تسجيل الدخول

عدد زيارات الموقع

222,966