بقلم - محمد حمدى
شهرزاد : بلغنى أيها الملك السعيد،ذو الرأى الرشيد،أنه حدث زمان،فى مملكة الشين،القريبة مِن بلاد الصين،أن ألهت الدنيا هناك الناس،وجعلتهم بدون شعور،ولا أى إحساس،إنقطعت الأخبار،وتقطعت الأرحام،وندرة التحية،والسلام ......
سالم : يا سلامة،يا سلامة،يا سلامة !
سلام : مين بينادى،على الباب ؟!
سالم : أنا سالم،يا سلامة !
سلام : سلامة مات العام اللى فات !
سالم : مات العام اللى فات ؟! بلاش هزار يا سلامة،وإفتح الباب !
سلام : سلامة مات،وأنا ابن عمه سلام !
سالم : أفتح الباب؛علشان أقعد معاك شوية؛أصل الصداع مُش مخلينى أفتح عنيا !
سلام : إتفضل،يا سالم .
سالم : هو سلامة مات إزاى ؟!
سلام : مُش تشرب الأول شاى،وبعدين أقولك سلامة مات إزاى !
شهرزاد : وشرب سالم،مع سلام الشاى،وبدأ بينهما حوارعلى أحر مِن النار......
سلام : هو إنت مين،ومنين ؟
سالم : أنا اسمى سالم،وكنت زميل سلامة فى الفصل،وكنا كل يوم بنلعب كورة بعد العصرِ .
سلام : إنت منين،يا سالم ؟!
سالم : أنا مِن البر التانى،مِن عزبة شانى،اللى جنب عزبة سانى .
سلام : مِن البر التانى،ومتعرفشى أخبار الشين ؟!
سالم : الدنيا تلاهى !
سلام : صحيح الدنيا لهت الناس؛وخليتهم يفقدوا العواطف،والإحساس !
سالم : هو سلامة مات إزاى ؟!
سلام : كان قاعد معانا بيضحك،ويشرب شاى العام اللى فات الضحوية،فتفاجئنا بالشيخ زكريا،وهو بينادى عليه العصرية !
سالم : موت الفجأة إنتشر كتير !
سلام : لإن مشاغل الدنيا كتير !
سالم : الله يرحمك،يا سلامة،ويحسن إليك !
سلام : بس الدنيا لسه فيها خير !
شهرزاد : وخرج سالم مِن عند سلام،على موت سلامة زعلان،ومعرفشى طول الليل أن ينامَ،و على عدم زيارة سلامة طول السنين اللى فاتوا نادم،وعلى صلة الأصدقاء عازم !
شهريار : دنيا حقيرة؛خلت الاخوات يدبحوا بعض علشان حتة فطيرة !
الديك : كووووووووووووك كوووك كوووووووووووووك........
شهرزاد : الديك صاح،والفجر لاح،إلى الغد إذًا يا مولاى .
شهريار : إلى الغد،يا شهرزاد .
👍👍👍