بقلم - الكابتن محمد حمدى
جلال : إنت الكابتن مُصطفى الحلوانى ؟!
مُصطفى الحلوانى : أه أنا مُصطفى الحلوانى !
جلال : أنا عندى ابنى،نفسه يلعب فى إنبى !
مُصطفى الحلوانى : حضرتك مين ؟!
جلال : أنا جلال على جلال،عندى فُرن،ونفسى ابنى يطلع لاعيب كورة قدم !
مُصطفى الحلوانى : بس إنت تعرفنى منين ؟!
جلال : دا إنت بقالك ساعة بتتكلم فى الموبيل مع كباتن كُبار،وكمان دا موبيل تاتش !
مُصطفى الحلوانى : عاوز ابنك يطلع لاعيب كورة قدم ؟!
جلال : ابنى،عاوز يلعب فى إنبى !
مُصطفى الحلوانى : وإشمعنا إنبى ؟! هاهاهاهاها
جلال : أى نادى المُهم يطلع لاعيب كورة قدم، وخلاص !
مُصطفى الحلوانى : هو اسمه إيه،و مواليد كام ؟!
جلال : هو اسمه على،وهو مواليد 2002 !
مُصطفى الحلوانى : شوف،يا أبو على،أنا معايا قائمة النوادى الكبيرة اللى فى مصر،بس علشانك هأعملك تخفيض؛إنت شكلك راجل طيب !
جلال : سمعنى القائمة اللى معاك،يا كابتن مُصطفى !
مُصطفى الحلوانى : إدفع 15 ألف جنية،وابنك يتقيد اسمه فى وادى دجلة،والإنتاج الحربى ب 13ألف جنية،ومصر المقاصة ب 14ألف جنية، والإسماعيلى ب 16ألف جنية،وإنبى ب 12ألف جنية،وفيه أسعار أقل بس أندية بتلعب فى القسم التانى يعنى عندك فاركو ب 8ألاف جنية،ودكرنس ب 7ألاف جنية،والحمام ب 6ألاف جنية.......
جلال : يا خبر أبيض ! طب لو مكنتش خادمنى، هتبقى الأسعار قد إيه ؟!
مُصطفى الحلوانى : هاهاها دا فيه ناس بتاخد قد الأسعار اللى أنا قولتلك عليها بمرتَين،وتلاتة !
جلال : طب أسعار الأهلى،والزمالك،كام ؟!
مُصطفى الحلوانى : لو عاوز ابنك،يلعب فى الأهلى ،أو الزمالك،أبقى شريكك فى الفرن !
جلال : هتشاركنى فى الفرن؛علشان الولد يلعب فى الأهلى،أو الزمالك ؟!
مُصطفى الحلوانى : أومال؛دا ابنك هياخد فلوس على قلبه قد كدا !
جلال : طب لو خليت الولد يحترف بره ؟!
مُصطفى الحلوانى : لو عاوز الولد يحترف بره، يبقى تتنازل عن الفُرن كُله !
جلال : والله ! وقعت مُتلبس،يا حلوانى؛إحنا بوليس ؛دا إنت مدوخنا وراك خمس سنين !
مُصطفى الحلوانى : هو إنت بوليس ؟!
جلال : أنا الرائد جلال عبدالكريم النشرتى !
مُصطفى الحلوانى : طب مُمكن أشوف الكارنية، وإذن النيابة ؟
جلال : إتفضل !
مُصطفى الحلوانى : والله وقعت،يا مُصطفى،يا حلوانى !
(ملحوظة : لقد كتبت تلك القصة القصيرة،ونشرتها على الإنترنت يوم السبت الموافق 23يوليو 2016م )
😂😂😂