حــبـــــــــل ا لــــو ر يـــــــــــد

..........

لا معنى له.
لما ينز العرق الطافح
من فروة راسى
يحفر سكة ...على جبينى
على خدودى
ينزل على صدرى 
ويقابل 
دم العِـرق النافر ..الثاير
يخرج م القلب الداير
ورا خطاويكى يرسمك
لا معنى له 
والطفل الجوانى ف جوفى
يزرع على ننى عيونى
ملامح شوفى 
وإديه الناعمة بتنبش 
فى حراجز خوفى
ويعاند
فيا دوب ينحت بضوافره
جدار جلدى ويعدى
يتفاجئ..
بنهار كانت شمسه بتضوى
ما لقاش الشمس ...فيعاود
يقفل على روحه بيبان القلب
يتكرمش فى الشريان
لا معنى له 
لما حروف إسمى المكتوبة 
على شاهد قبر
بالطباشير
وانا راقد جوة الكفن استنى اللى يعدى
يقرا الفاتحة 
أو ينسى على شاهد قبرى
كام دعوة على كام تسبيحة
يوهب لى آيات الرحمات والتبشير
وتعدى ايام 
ولا حدش عدى
تتسحب روحى 
تخرج من بين الضلع الدايب
والكفن المتغرز 
خمسين غرزة
وتلاقى حروف الإسم 
على الشاهد
مسحتها ..حبات مطر
لا معنى له 
لو بموتى زرعت طوبة
يعلى بيها جدار أمانك
لو بدنى ..رويت حصاوى الرمل
لو بكلمة من كلامى
فتحوا العيال كراسة الواجب
وبعد البسملة 
كتبوا التاريخ
العنوان الجديد
الشعب ...يريد
يبقى الوطن ..أقرب الينا
من طلوع الروح
يبقى الوطن 
أقرب إلينا ..
من حبل الوريد
..............
بــقـــلــــــــم ا لـــشــــــــا عــــــــــــر
أ بــــــو عــــمــــــــا ر ا لـــمـــصـــــــــر ى

أعجبنيتعليقيعجبك هذا.

التعليقات

امل الغد ما اجملها من كلمات تحمل المعاني الكثير 
اهنيك على جمال كلماتك
كنت انا هنا وتأملتك وتأملت روعة
احساسك وصدق مشاعرك
كنت هنا وقرأتك كتاب مفتوح من المشاعر الجياشه
كنت هنا وسعدت بأن اقرأ لك
لـ عمقك جليل التقــدير ..
آرق تحيه لقلبك
لارواحكم زفرات السنين
ودمت شامخا بشموخ الوطن
ويسلم يراعك ابو عمار المصري صديقي واستاذي الغاليأعجبني · رد · الآن