عيد ميلاد

صفارات الانذارات
صوت بيعوى ف الحارات
طفي نور بيتك قوام
العدو جاي بالغارات
والصوات ..
جاي مع صوت المدافع
رغم ده لسايا سامع
تمتمات ....
ناس بتسأل ....
أل صحيح السد واقع 
طب قولولنا ؟ حد مات
وتاني فيه صوت همهمات
كلام غريب... تخبيط حاجات
فيه صوت.. بيقول اجمدي
وواحده تانيه ... شدي حيلك
هانت يابت ماتحزقي
اما انا.......
حاسس ف حلقي مرار
بيعصرني الألم
فجأه اتنفضت من السبات
طلقك حمي 
القرن طش 
الراس اهى عدت خلاص
وظهرله وش
الله عليه .... دا طلع ولد
وسمعت صوتها
كأنه سحر ...
فرحانه وماليها الوجع
جبت الولد ... اخو البنات
ضهري اتسند
قبل الممات
يااااارب سترك ع الولد
من شر حساد البلد
بعديها دوبت ف حضنها
وشربت سرسوب الحياه
ورقصت على صوت قلبها
وفجأه فوقني الصوات
صوت القنابل 
وانفجارات الدانات
ضمتني تهت ف صدرها
وبدأت وصله من العياط
وهو ده ...........
كل اللي فاكره من الميلاد
مولود ف ضلمه 
مولود معايا الموت 
مولود ف إيدي
غاره قاسيه ومرعبه
هدت حيطان نص البلد
شفتوا العجايب والعجب
بيعملولي عيد ميلاد
عيد ميلاد ¡¡¡¡¡¡¡¡¡
جاتكوا السواد
عالم .. ب شر
عايشين ف دنيا مشقلبه
حتى ف يوم الفرح لابسه
توب حداد
ويقولولك عيد ميلاد
صحيح .... بشر
رضا ابوحسين

التعليقات