قصيدة ماتسألنيش

روح إسأل بكره ليه إتأخر ..... ماتسألنيش
عشان لو مية سؤال مالك .... جوابي مفيش
ده انا المرسوم على جبينها... تاريخ ماضي
وانا المركون ف دهاليزها ...... دولاب فاضي
مفيش فيه ذكرى تلمحها.. كده ف بالها ... وتتبسم
ولا هديه هاديتهالها ....تشوفها عنيها... تتندم
ماتستناش .. ده بكره اللي بتتمناه . حلف مايجيش

ماتسألنيش

ماتسألنيش ..... طريق الفرقه ليه دايما كده سالك
طريق مشيناه ...وف أخره عتامة ليل ضلام حالك
وخوف بيزيد .. ف كل خطاوي ف بعادنا .. بنمشيها
وحتى الإيد ... بتنسى اكيد ايدين تانيه كانت فيها
انا الغلطان .......باغير دايما على حاجه ماهيش ليا
بنام مهموم.....وقلبي عليل وبرضه جرحته بايديا
خلاص مليت .....اعيش احلام مش ليا .. ماحلمتنيش

ماتسألنيش

وليه أمشي كده ف طريق ...ماكانش من الاساس ليه
مشيتوا ليه من الاول ......مادام السكه مش هيه
خلاص قلبي ........معادش يساع جراح تاني
انا اللي دبحتوا بإيديا...أنا الطيب .. أنا الجاني
ولو هارجع واعيشها اكيد...هاعيشها ضله ع الحيطه
وهاحبسني ف افكاري ...وقلبي اعملوا تحويطه
ومش هاسألني عن بكره خلاص بكره .. مايلزمنيش
روح اسأل بكره وانساني
ماتسألنيش

إعجاب   تعليقأنت و ‏‎Ahmed El-saied‎‏ معجبان بهذا.

التعليقات

امل الغد كلماتك رقيقه واسلوبك ناعم واشواقك تعانق السحر والخيال ...
حقيقة استمعت جدا بقراءتها تمنياتى بمزيد من الابداع والتألق وانت سيد التالق ودمت بالق وابداع مستمرين استاذ رضا مع خالص ودي وتقديريإعجاب · رد · 1 · ساعة واحدةرضا ابو حسين جزيل شكري وخالص مودتي استاذه امل تحياتي وتقديري لحضرتكإلغاء إعجابي · رد · 1 · 51 دقيقةامل الغد احترامي وتقديريإلغاء إعجابي · رد · 2 · 48 دقيقة