ســــو بــيـــــــــــا

......
واقف على راس الحارة
وينادى يخبَّـط بصاجاته
بيغنّى على موال ليله
أو يمكن على ليل مواله
وبصوت
ولا كروان الليل.
يـــلا السوبيا
قشطة يا بيضا
رابط قِـدرة كبيرة ف وسطخ
تـِـقسـِم وسطه
وبيضحك برضو وبينادى
يلا يا كل ولاد الحتّة
مين راح يشرب ؟
مين قال سوبيا ؟
بقرشين صاغ
قِشطة يا سوبيا حليب ربّانى
ويخبَّـط بصاحاته من تانى
كل عيال الحِـتـَّة يروحوا
يعملوا دايرة كبيرة
حواليه
بـِتّ يا نـِـعمة 
إدّى لأخوكى شويـِّـة سوبيا
لأ ..وانا مالى 
جاب بفلوسه كلها ..نـدّاغة 
ما ادانى واحدة
بس ادّيله 
علشان خاطرى
قامت سمرا ..البت السمرا
خـُــد يا سلامة 
إشرب حـَبـَّة
لأ ....مش عايِـز
ما انت ادّيتنى امبارح برضو
قِـصّـة حب وكبرت بينهم
حبّة بحبّة ..بحبّة سوبيا
طِعـمـة يا سوبيا
تارتجل بعيونه السودا
وعـِمـِّته بيضا
قال هـدّيله يا سمرا يا غالية
خـُد من إيدى
حبّة سوبيا 
اشرب يا سلامة
كان بيبيع خمسين كُـبّاية
ياخُـد بس تمن عشرين
يِدّى اللى معاه والـ
مش لاقى
ما يشيل هـَمّ
يعشـّى ولاده بإيه ومنين
ربـَّـك يرزق
وام إمام فى الشبَّـاك واقفة
شليفة الحارة بنص العين
مادة يادوب كدة
نص دراعها
خايفة لا ييجى عَـمّ أمين
ما هى عيبة الشارع يلمحها
ديل جلابيتها 
دة عار لو بان
هات كُـبَّــاية يا عم حسين
هو الصوت اللى يميِّـزها
شِـبـَّاك بيتها ف أول دور
خُـدى يا سمارة 
إدّى لخالتِـــك
دى على حسابى ....
يا ام إمام
لأ يا نَـداشة ..أمين يِدبَـحنى 
إوعاك يِـعرف 
يِـخرب بيتى يودّينى لامى
هـُـبّ وطَـبّ الحاج أمين
جِـريوا ولاد الحتَّـة عليه
عملوا له زيطة
واتأخـَّـر هما دقيقتين
كانِت دخلت ورا شِبـّاكها
إدّارِت وف غَـمضة عين
حلوة يا سوبيا
عسَـل الفُـقرا
خُـد كُـباية يا عم أمين
يا تبو عرباوى 
يا عِـشرة يا غالية
قلبك أبيض زى السوبيا
ألف سلامة 
جـَبَرت..
روّح يِـقلع تـُقـل همومه
فَـك القِـدرة وفضّى هدومه
قروش فضّـية
خُـدى يا سنيّـة
تمن السُـكـَّر والسبـّوبة
والباقى ليكى 
هاريَّــح نوبة
واطلع ...أسرح
كل عيال الحتّة بتفرح
لما بيسمعوا ..رن صاجاتى
واغنى يوماتى
قِـشطـة يا سوبيا
طِـعـكة يا سوبيا
عـَسـَـل ربـَّانى
.............
بــقـــلـــــــم ا لـــشـــــــا عـــــــــــر
أ بـــو عــــمـــــــــا ر ا لـــمـــــصـــــــــــر ى

التعليقات