حمد لله ع السلامة

)()()()()()(

لسَّاكى راجعة م السفر
مالية الشُـنَط كوابيس
ولا دى ..هجرة مؤلمة
سِـبتى الآيات المحكمة
سبتى السور ..كل السور
ومشيتى ورا إبليس
يا ام الشموس 
كات قايدة ضلمة كل ليل
وخيوط دهب ترمى الدفا
جوة القلوب
وبتغزل المناديل
ترمى الأسى 
فى الأغنيات الممكنة
وتشَـنـَّقى المواويل
ماسكة ف حمام 
وجناحه شاخ بتربـّى فيه
وتدبـَّحى الزغاليل
واقولك ايه ؟؟؟
ألفين سلامة ع الرجوع
سلمتى كل شراع سفاينك للهوا
واتكسَّـرت مجاديف نجاة
سلمتى للريح اللى ما يرحم
كل البواقى من رقع
ساترة تجاويف القلوع
دفنتى كام شهيد هناك ؟
شنقتى كام برئ هناك ؟
صلبتى على قلب المحبة 
كام يسوع ؟
ما احلى الرجوع
ما احلى الحياة بعد الممات
من غير خلود
ما احلى الوعود
يا ام العهود متجمدة
وبتاخدى من دة 
تدى دة
ورجعتى تانى معددة
حتى الحوارى والشوارع 
تبكى ع الحق اللى ضايع
تبكى نخل لتحت طالع
جدره سايب 
شوشه ماسك
واللى قال حبك وباسك
واللى مشغول بالمناسك
واللى لابد تحت راسك
كله دود
يا ام الحدود 
ع الحد واقفة
ميت حداد
لابسة السواد
حادة المناجل والسيوف
الزرع خوف ..الضرع صيف
إلا الضيوف واقفين صفوف
الضلمة إمتى كات تشوف ؟
شيلى الكتب من ع الرفوف
شيلى النقط من ع الحروف 
اقرى اللى ما بين الكلام
زفى اللى راح 
ع القبر راح يلقى البراح
الموتة فيها ميت صباح
دقى الدفوف
قيدى الشموع
يوم الفرح ..يوم الرجوع
متجمعين
واكلين مرار 
شاربين أنين 
فاتت سنين
متكتفين 
يا نص رملة ونص طين
الرملة سخنة 
الطين أمين
أنا تهت فيكى فكرينى
أنت مين ؟
هو انت مولودة النهاردة
ولا ...والدة ودة السبوع ؟
ألفين سلامة ع الرجوع
............
بـــقــلــــم ا لــــشــــــا عـــــــــر 
أ بــــــو عـــمــــــا ر ا لـــمــــصـــــــر ى

• يعجبك هذا.

التعليقات

• امل امل الغد الغد مَا اَروَع اَلحَرفَ حَينَ يتَوجَ بالَاحَساسَ
  وَماَ اَروعَ الَاحَساَسَ حيَنَ يَداعَبَ اَلرَوحَ
  وَماَ ارَوعَ الرَوحَ حَينَ تبَصمَ بالَابَداعَ...عرض المزيدإعجاب · رد · ساعة واحدة
• اكتب تعليقاً...