الشاعر عبدالله صبري... وفاضل ع الحقيقة 2 جنيه
باحب الشمس تطلع من جيوبي
واحب احفر بحور بقلوب وريش
وباكره كل شئ هادي وطبيعي
وباعشق في القمر شعرُه الكنيش
واحب اكدب واحب الناس تصدق
واحب امشي فــ دروب ما بتنتهيش
واقول للبنت باعشق ضي روحك
وعقلي شايفها قالعة ع السرير
أنا الشيخ اللي لابس خيش وزاهد
وجوّاه مؤتمر قطن وحرير
باموت في المسخرة وخدش المبادئ
واحب انهي الحاجات وانا لسا بادئ
وادور انزف عسل وانا قلبي حادق
واحب اشفي العيون واعمل ضرير
تعالى نروح هناك علشان نناضل
وننقذ مجتمعنا م المعاضل
ونلبس طيبين / نعمل أفاضل
دا فاضل ع الحقيقة 2 جنيه
وهي الناس دي بتشكك في ايه ؟
صباح الخير يا بنت يا ساكنة روحي
بلاش خناقات مع الدور اللي تحتك
مساء الخير يا بنت يا ساكنة فوقها
فاضلك كام عمارة وتاخدي راحتك
عايزني ابقالك ايه دايماً يا صاحبي ؟
أبيعك يوم ويوم ولا ابقي ضيّك
بلاش تطلب كتير نلغي اختلافنا
هاخونك واقتلك لو هابقى زيك !!
باخاف اكتب بجاف اغلط معاكم
واخاف امسح ذنوبي النار تغنِّي
في باب الصمت ركز ع التأني
عشان الدنيا تفرح بالنتيجة
يا ريت قهوة بصهيل وحاجات بهيجة
وشوفلي معاك 8 سماوات وفكّة
وأرض وزمزمية وحد غيري
ومفتاح للقمر وافتحلي سكة
وحججني لبارات وبنات شيكاغو
وخلي الناس تشوفني هناك في مكة
ساعات يبقى الغموض موقف جمالي
إذا القبح اشتغل نٌقط ارتكاز
تعبنا العلم في الكون لارتجالي
وصورنا الظروف .. ضِحك المجاز
هيفضل منطق الواقع خيالي
ما دام بُكرة البرئ والع بجاز
ساحة النقاش