محمد رزق

الشاعر/ محمد رزق

كانوا زمان بيأكدوا .. 

إن الرواية لجل ينجح نـَصَّــها ،

فيها البطل لازم يموت ... 

ويجهزوا مشهد نهاية محترم ،

ويأكدوا إن الخيانة للمعانى كلها ،

لازم على العالم تفوت ...

بس الطبيعى ان البطل لازم يعيش .. 

وان المعانى تنتشر جوا البيوت ، 

والمتهم يطلع برئ ، 

والمحكمة ترفع ايديها للسما ، 

وتنادى ع القلب الجرئ ، 

تحكم ويقدر حكمها ، 

يروى الشجر ويبل ريق ، 

والعاشقين لو يشربوا .. 

هيقربوا ، 

ويعَـدِّلوا مشهد نهاية كان غلط ... 

أو يكتبوا .. 

إن الجمال مابينتهيش .. 

وان البطل لو مننا ... لازم يعيش ...! ...