بحر الناس
قرّب قرّب رايح فين
قرّب طرطأ لي الودنين
هنطلع رحلة في بحر الناس
ونعود تاني في غمضة عين
إللي هناك دا إسمه حسين بيه
شفطنجي لومانجي واد إنما إيه
حلنجي برنجي اللعنة عليه
هلف وشحط بياكل سحت
والألاضيش بتبوس في إديه
والست دي داهية إسمها إحسان
إنفة وخنفة بنص لسان
على طول بخّة ف ودن الناس
بلسان مشقوق زي التعبان
وإللي هناك دي الست رجاء
كلية ألسن فرع بولاق
قويّة عفيّة بليّة رزيّة
مفيش زيها كده في الأنحاء
ودا غير جوزها علي الحلاق
ليسانس برود بلسان سبّاق
في نم وذم فلانة وفلان
تخرج من عندة بمية داء
وإللي واقف ع الناصية هناك
ديك العشة أبو بست وراك !!
وأيها فرخة بدارة تعدي
بكل بجاحة يقولها كاك
والنت إللي بتبرق ديّا
ماشية تقول تحيا الحرية
لابسة محزق قوي وقصيّر
فاهمة إنها بقا كدة عصرية
تنزل كده بعد العصرية
من البيت دوغري على الكليّة
في جامعة تفوق كل الجامعات
جامعة الدول العربية
دي نهاية الرحلة ف بحر الناس
لكن دول مش كل الناس
بكرة أنا وإنت هنطلع رحلة
ف وسط محيط ناس غير دي الناس
بقلم طارق السيد