صرخة فلسطين .
حكاية عاديه في نظر الأمه العربيه
أشعار موسى عثمان

في يوم من الايام

كان الضباب منتشر

حتى الكلاب نايمين

وكان السلام .... كلام

وأنا كنت صاحي وقتها
مش عارف انام

وكان المسيطر ع الشعور
صوت الانين

وكنت قاعد
مكتئب يائس حزين

قولت لنفسي

انا نفسي أفسر كلمة حلوه

لما اقولها

يرجع صدى حروفها في قلبي
بصوت رنين

وجهت نظري في اتجاه المكتبه
ومشيت يدوب خطوتين

وجبت أطلس للخرايط
من بين كتب مترتبه
وقولت أقلب صفحتين

ورجعت تاني
وقعدت ع الكنبه
اللي مني قريبه

وصممت اشوف بلادي فين

فجأه هبت ريحة نتانه مرعبه
من بلد طاهر سجين

قولت بلدي ايه جرالك
ولا ناسك راحوا فين

صرخت ساعتها
آآآآآآآآآه
و قالت .
.... ناسي ايه
.. ناسي مين

ناسي سافروا
وتركوا ارضي
ووهبوا عرضي لبنيامين

بس دول مش كل ناسي
ناسي مش بيطاطوا راسي
ناسي مش ناس مذلولين

ناسي فيا عشقانين
وف ترابي مدفونين

وإنتا يا ابني جاي لمين

قولت جاي عشان أشوفك
جاي عشان أفسر حروفك
إنتي عشقي من سنين

قربت
همست في ودني
إنتا بتفسر في إسمي
إنتا في الأول عارفني
إسمي إيه ولا أبقي مين

قولت والحيره في عيوني
من ذهول الكلمتين

أيوه عارفك

إنتي بلدي
وإنتي سندي
وإنتي عندي
أغلى من نور العنين

عقلي قال لي يلا فسر
كل حرف وكل منظر
شوف هتوصل بيه لفين

قولت أيوه راح افسر
بس بين نفسي وبيني
قولت انا هفسر لمين

بس كان لازم افسر
كل حرف وكل منظر
للغلابه المطحونين

فلسطين

ف/ فوق جبال الشوك بنادي
وإنحبس صوتي الحزين

ل/ لسه باكتم في اهاتي
وابن عمي مات سجين

س/ سبت كل سنيني ضاعت
نفسي أرجع بس فين

ط / طب قولولي أروح لفين
لما يغلبني الحنين

ي/ يعني اسكت
طب وماله
إسعوا صوت الانين

ن / ناس بتبكي على بن عمي
وناس تغني وفرحانين

ناس بتاخد أرض مني
إلحقوني يا مسلمين

كله قافل ليه عيونه
وليه قلوبكوا مسنكرين

فلس خلاكوا ديابه
وحط جوه قلوبكوا طين

ليه بنسكت ع اللي خاننا
وليه ضميرنا منيمين

وأما تحصل حاجه بيننا
مفنجلين ومصحصحين

راح صلاح الدين وخلا
مسلمين مستسلمين

راح زمانه خلاص وولى
مين هيصلح فيكوا دين

كان كلام جوايه قولته
ف كلمتين مترتبين

مش هتتحرر لحالها
مش هتبقى حتتين

دي هتبقى ألف حته
وكل حته ليها دين

كل يوم بياخدوا حته
وإحنا عاملين مكفوفين

راح ضمير الأمه قال لي
تطلع ايه ولا انتا مين

قولت عربي ونفسي
ألاقي حلم بحلم بيه سنين

نفسي أدعي وناس ورايا
من قلوبها تقول امين

ناس تجيب الحق لما
يجور علينا الظالمين

ناس تقول للذل لأه
و بالكرامه مولودين

نفسي أقول آخر كلام

هوه ده مسك الختام

بعده مش هسمع طنين

مفيش سلام مع معتدين

أشعار/ موسى عثمان