فيها وفيها
مصر الحلوة أم الغلمان
فيها الغني قوي والغلبان
والبنت الكول والواد المان
وغراب البين مع أبو قردان
فيها الأهل فيها الخلان
فيها من صانها وفيها من خان
واللي يصبّح واللي يقبّح
واللي يشبّح واللي يدبّح
واللي شرب م المر كاسات
سكر من ألمه ومشي يطوّح
فيها ابو دم خفيف شربات
وفيها اللي مقضيها ينوّح
واللي يخش البيت من بابه
واللي سلالمه ماسورة البيت
واللي ياعيني إستحلى عذابه
واللي ماأدى وقال آديت
واللي فى بيته بارم شنباته
وبره البيت تسمع فى آهاته
فيها دلع وفنون وشقاوة
وفيها هلع وجنون وغباوة
فيها الشرق إمشيه هتغرّب
تطلع منه شمال هتشرق
واللي يفرّق واللي يحرّق
واللي مشورته تملي تغرق
فيها وفيها اللي مكفيها
فيها ولادها اللي بتحميها
فيها أعاديها بتنهش فيها
فيها الذكي قوي والرفاس
فيها الفهلوي والمحتاس
فيها وفيها اللي مايتقال
فيها واقعها وفيها خيال
فيها البحر وفيها البركة
فيها السلم وفيها العاركة
فيها خيولها جمالها الباركة
فيها سعيدها وفيها تعيسها
فيها الطيب فيها إبليسها
وفيها الجن اللي بيلبسها
فيها الغالب والمغلوب
واللي بينهب والمنهوب
وباب السما دايما مفتوح
للي يحب يتوب ويئوب
بقلم طارق السيد