مصر بلدنا
مصر بلدنا كنيسة ومدنة
والقديسة ومولد سيدنا
حبنا ليها زادنا وزوادنا
اللي بيرضيها ربنا يرضيه
مصر أصيله معدنها الفضة
لون القمر إللي بيتوضى
في مية نيلها إللي بتتحدى
إللي بيشرب منها بترويه
واللي عليعا في يوم يتعدى
يقول دي عشايا بيه بتتغدى
بلد مبدأها الصدة بردة
وتجنح للسلم تعيش فيه
مصر القطن طويل التيلة
وعيش مع دقة ولمة عيلة
في ليلة العيد عاملين هليلة
إللي بيحضرها بتهنيه
مصر الدار وحق الجار
وطبق الفول بالزيت الحار
والتحويجة من العطار
للي الطب بيحتار فيه
مصر بلدنا أم الأبطال
ياما وياما شالت أحمال
أحمالها ماتتحملها جبال
واللي عليها بتأديه
هي دي مصر أصل وفصل
وراية نصر زاينها النسر
إللي بيحمينا ربنا يحميه
يارب ياعالم بالأحوال
خفف عن بلدي الأحمال
اكفيها واغنيها عن أي سؤال
دي ضي عنيا اللي بشوف بيه
بقلم طارق السيد