جارى التحميل
استخدم زر ESC أو رجوع للعودة
أنا مصراوي .. بقلم طارق السيد
أنا مصراوي إسأل عني
ربابة الراوي أو حتى الجني
أو إسأل عنى إللى انت عارفهم
وإسأل حتى كمان بارليفهم
وقت الحرب أنا قمت بدوري
عبرت عبوري أسرت ياجوري
وكعب بيادتي غرز فى رقبته
فى عز الضهر فى وسط ديابته
أنا مصراوي الضربة الأولى
أنا اللى هزمت جارتنا الغولة
ورجعت بسينا ولا احنا نسينا
وان كنا نسينا نسأل نفسينا
لسه بتسأل أبقى أنا مين
راح اقولك تانى ياغراب البين
انا حصة شرح فى درس تاريخ
انا شجره قويه فى وش الريح
أنا أحمد نجم وشيخنا امام
وكنيسة ومدنة وبرج حمام
عرفت انا مين أنا عم أمين
ومينا وحنا وعلى وحسين
ونديم وعرابى وزغلول وفده
انا إبن النيل وإديا روافده
أنا شبرا وغمرة ومصر عتيقة
أنا صاحب صاحبي فى وقت الضيقه
أنا لمة عيلة فى ليلة العيد
عشاها الدقة وعيدها سعيد
على الله تكون عرفت انا مين
انشاء الله تتوب ياجهول الدين
دينا الواحة لكل غريب مع رحمة ونور على كل منيب
دينا سماحة ماهوش ترهيب أساسه الرحمة مش التعذيب
مافيهوش خرطوش مافيهوش مولوتوف
مافيهوش صواريخ مافيهوش جرينوف
فينا المذنب كل حياته وتاب لله فهداه لصراته
كلنا لينا رب نقف قدامه نترجى فى يوم العرض سلامه
سيبونا وحدينا للى خالقنا إحنا عباده وهو بارئنا
مجلة همسات سندريلا مجلة ادبية شاملة تهتم بنشر ابداعكم فى شتى المجالات
