دموع الليل
^^^^^^^
أبعد عنك و تبعد عني
أنا ما هلومك و لا هتلومني
هي الدنيا كده عيزانا
تبقى بعيد و يفضل همي
لما تروح و تمشي بعيد
و لما أشتاقلك قوي يا حبيب
و ألاقي الدنيا كتير ظلمانا
جوه الليل هبكي أكيد
و لما أشوفك و لا تشوفني
و لا في وسط الناس تعرفني
يومها أحاول إني أدارى
و روحي حاسسها تطلع مني
أعمل نفسي ليك ما أعرفشي
و عيني عليك و أنت بتمشي
تفضل عيني عليك حارساك
حكم الدنيا ليه ما أعرفشي
أمسك قلبي و أقول يا خسارة
فيكي يا دنيا حبيب يتدارى ؟
فين الحظ و فين أيامك
أبكي عليكي بكل مرارة
آه لو تعرف إيه يا حبيب
لما ب تبعد و لا تغيب
تبقى نار جوايا تحرقني
و أصبر قلبي و أقول دا قريب
بس بقولك ابعد عني
يمكن مرة في يوم تفهمني
إن القصد حسن النية
و إني سعادتك أكبر همي
كل محبة بيني و بينك
أنت سببها و كتر خيرك
و كل الحب اللي زرعناه
لك في القلب ما كنش لغيرك
أفضل فاكرك مش هنساك
قوللي إزاي أنساك يا ملاك
تمشي و تيعد عني بعيد
لكن روحي تبقى معاك
كل الحب في قلبي عشانك
و أفضل فاكر كل كلامك
كلمة بكلمة مش هنساها
يمكن مرة تعود أيامك
شوفت سجونك أكبر منك
و لما الدنيا تفرج عنك
أفضل لما تعود أيامك
أبقى بعيد و أسال عنك
أنا يا حبيبي خلاص محتار
بين الجنة و بين النار
أنا مش عايزك تبعد عني
بس قوللي أزاي أختار
عايش عمري كله عشانك
قلبي و روحي أوهبها لك
لكن هي الدنيا خانتنا
قالت لازم منه بعادك
مهما تبعد هفضل فاكر
و مهما الحزن يجيب م الاخر
اخبي نفسي في دمع الليل
و أقول البعد عليه مش قادر
أنت الدنيا و كل أيامي
و أنت حياتي كمان أحلامي
شوف الدنيا أزاي سرقتنا
أنا مش قادر أشوف قدامي
^^^^^^^^^^^^^^
بقلم / رمضان العلالقة
من ديوان ( دموع الليل )