...........................الضريبة.................................
قالوا أمان يابلد
أنا قلت بضريبة
قالوا حدانا ولد 
قومي ارقصي يانجيبة
كراماته مالها عدد
روحي الحقي تحجيبة
حلال لكل العقد
يفك اعتى مصيبة
معين لينا وسند
حبيب لكل حبيبة
تسمعه يبان لك أسد
تعامله تلاقي أميبة
قالوا زمان في المثل
فاجرة وعاملة أديبة
لاتغرك السهوكة
ولا مطوحة شريبة
وان جال لك المحترف 
هات له عيال لعيبة
خلي بيبانك مواربة
راح تنجدك تسريبة
يا رايدين الحياة 
على كل لحظة ضريبة
أول ضريبة لولادتك
خروجك لدنيا رحيبة
والتانية على أنفاسك
والتالتة على الزبيبة
والرابعة نعمة بصايرك
والخامسة دقون وشبيبة
والسادسة طنين المسامع
والسابعة قواك العجيبة
والتامنة على الخطاوي
يا ابو الرجول دبيبة
والتاسعة سلاسة كلامك
والعاشرة لمالي الزكيبة
والضحك ياواد يا رايق
والصمت عليه ضريبة
الحق يا ابو كرش بايت
نزل كرشك ببيبة
بيقولوا فيه ضرايب
على البطن اللي كتيبة
ادعي ربك يصيبك
تلقي روحك كئيبة
أو امك تدعي عليك 
يارب يجيلك مصيبة
علطول تصبح رشيق
للمرض جسمك نهيبة
وانت يا ابو الطوال
قول طولي دا والله عيبة
أو اعمل نفسك عبيط
لا تقولي عطمة وهيبة
داري جمالك ياشابة
خليكي وحشة وأريبة
عارفك أنا يانوال
مايهزك مليون ضريبة
اسمع ياعبد العال
اجعل حياتك رتيبة
ليقولوا انك عال
خلي بيتك زريبة
وانت يا اللي انت حامل
عليكي العيون رقيبة
قولي دا حمل كاذب
جوزي دا كله طيبة
بينام من المغربية
أهبل ماعنده ريبة
ياعالم مليان ضرايب
ننام نصحى بضريبة
ضريبة على الأماني 
ضريبة على الأغاني
وضريبة على الضريبة
عاوز تخوف ابنك 
قولوا اوعى الضريبة
أو تهدد مراتك 
قول والله شايف ضريبة
أو رايد تغيظ حماتك
ناديها وقول ضريبة
ياشيخنا وانت ساجد
والله اجابتك قريبة
ادعي وقول يارب
ارفع عنا الضريبة
يارايدين دجال
يعمل لوقف الحال
وفر عليك فلوسك 
واكتب حروف ضريبة
وانا ماشي في التجوال
بدندن بالموال
قربت من التمثال 
لقيت خطيب وخطيبة
عم بيقولوا في كلام
عمال على بطال
والوجد بيهم مال
فجأة وقام زلزال
ولقيت لمة رهيبة
يدوب بسأل سؤال 
ايه غير الأحوال
صفعني بالعقال 
كتفني وقال ضريبة
رحت اشتكي ياخال
وأقول أنا بطال
كلي يريد احلال
وشبابي بقى شيبة
رد عليا وقال
رايد هروب ياهلال
لو هتعد الرمال 
أو هتهد الجبال
تروح يمين شمال
هتدفع الضريبة
بقلمي | محمود عبد الخالق عطيه المحامي