أقروا فاتحة
ع اللى أبدع النهاردة
وشيلوا روحه ف شطرة ناضجة
وافتحوا قبر الكناية
وافرشوا تحته استعارة
العمارة اللى بناها
ف القصيدة
مات جنابها
بعد إذن السادة خلُّوا
ثقب واحد بعد غلق
الباب عليَّة
يمكن اصحى لما هاسمع
صوت حذاءكم فوق دماغى
واشوف واراعى
مين اللى باقرا
واللى بلعن ديك أبويا
واللى باغمز
واللى باعطس
جوا وشِّى
والملايكة يمسكونى
أعتذر منكم سيبونى
أطلع شويَّة
أكشف قلوب بالزيف ملانة
وان الحبيب ما هوش حبيب
لو سمحتم
اذكرونى
إنى عشت ف جوف حروفى
بين سجعها والبديع
عمرى ما حطمت كافها
كنت بزرعها بربيع
والبديع
إنى ما عتَّقت فيها
غير خمور الحب للى
أمُّه حوَّا
باس قدامها
ويحترم آدم أبوه
اذكرونى إنى ما فكَرت أبدا
غير نيامى ف بيت قصيدة
والتحف بالكاف ونون
لما شوفت الدم قلت :
كفنونى قبل موتى
وادفنونى ف العيون
هاتوا مقرىء
عزُّوا فيَّه
صوَّروا مين اللى جانا
واللى كسِِّل
قولوا دورك
راح هاييجى
مش هاطلَّع
تصريح بساعة
واعزِّى فيك
النهاردة افتكرنى إنى ميِّت
والوجع حصَّل خيالى
وارتجالى صورة حلوة
ف صفحتى على فيس ساعدتك
أو تويتر
السيجال كان فيه دموعى
وانت ناسى
كنت قاسى
والشجون برق ف حروفى
ادَّاريت وقت احتضارى
ليه ما لقنتش يا صاحبى
كنت باصص ليك تقولها
بس رحمة من إلهى
قلتها ما حوجنى ليك
شوفت طير بيشيل ف روحى
واعترفت إنى ميِّت
إنى ميت
