تِعَرَّضْ لِى ودان جهلك
ها اشد الحبل ع الآخر
وها اتاخر بعيد عنك
لدنيا بعيدة تتجاهلك
فلا المفروض ولا الجايز
بغض الطرف عن فايز
هاضُمِّ الضمَّة وافتح لك
شاليه قلبى
وغايته البحر باندهلك
تطفِّى النار
وتشعل نن نظراتك
لمرجانه
فأفنانه
تخلى العين جحوظ دايم
ورعشة شوق لروح هايم
بلاش تتخَضِّ واتمهِّل
ودندن حتى تتأهِّل
لدهشاته
رموش الحب همساته
تعالى ونام بكوخ قلبى
مهب الريح
على دربى
تفوح أشجان
صهيل الرجفة للساحل
جيوش إدمان
لأن منارتك الماضية
بقت حرمان
عليك تسبقنى للمركز
وتتمركز على شغافى
شعور دافى
بيأثرنى
ويدخلنى سهام كيوبيد
أظل شرود
اذا عرَّضت أحلامك
لفجر بشقشق الرعشة
وذروة لحظة التوهان
فناء خالص
ووحدة بتشبه الحلاج
كسكر داب
بكاس حبه
ما بين تبخير
وبين تجميد
يبان المعدن الصافى
ولؤلؤ ضج من صدفه
وشع شعاع على اكتافى
زبرجد قول وفيروزة
ولحن كَمان بيخلع نطفة
مغروزة
ف صدر الآهة والأوجاع
بتتكهِّن...؟؟؟؟
سئمنا السجع والسجَّاع
ومين طيَّر
ومين بالعشرة ضل وباع
رجمت الطيف جسد فاقد
لروح الحب
عشان تضمن ربيع فاير..
عليك بالشمس تمسكها
وقمراية بتسكن قلب
رعود المسك تفنينا
وبرق العشق يمطرنا
على غيرنا
تهب الغيرة وجموحها
حروف بوحها
خيول جامحة ومين روَّد
وتتأوِّد
وانا المذبوح مابين خدك
وبين صدك
وبتعرَّض ودان الخوف لموج بحرى
انا القبلى
أنا البحرى
خيوط الحب ف صوابعى
باقيدها نجوم لمين جدِّف
وباحجبها عن الغافل
وباطافل
واصوِّبها حنان زاجل
غصون زيتون
شفايفك إوعى تدهنها
لمون ف لمون
فمص الريق نيران وجدك
وحان قربك
وحال صُوفى
رباب الحسن من شوفى
أخلى الدنيا عشقانة
لحب كبير
ونهر عبير
وضمة تشبه الحلوى
مذاقها غدير
