غصب عنى
بافتكر لك كل حلوة
وانسى لمحة معذبانى
بافتكر لون العيون
بحرها مخلوق عشانى
لما نجرى زى نسمة
أو نطير
ريشنا لون الشمس
أو زهر العبير
نفترق من خلف روحنا
جوا روحنا قريبين
عشق صافى زى نهر
جارى ف الجبين
إن غدونا
إيد قلوبنا ماسكة فينا
حاضنة لينا
شوق بزيد
ناره حامية
من جديد
بس حلوة بطعم حب
الجمال شطرة ف سطورنا
والربيع لينا انتسب
سكر صاحى ف القلوب
من غير كاسات
واللى بفنينا الآهات
ليل بطوِّل لما نسرح
ف الجهات
كون ملايكة جوا منا
رفرفِت بين السكات
بافتكر لك غصب عنى
كل شجرة خلف منها
خَدْت قلبى
ياه لحبى جمرُهْ نور
أى ناحية ابص منها
أتلاقيك عصفور صغير
شقشقة وقنديل وقمح
وناى بيقطُف زهر شوقنا
زى طيف
أو حتى رمح
بافتكر لك
رحلة كنا جوز كنارى
عشنا نظرة بالهيام
أدخلك واقرا الكلام
سحر بابل بين جفونك
وانت بتعلَّقنِى فيه
لو هاموت بالحب منك
عمرى أبدا ما اشتكيه
هافتكر لك
يوم ما هاج الموج علينا
قمنا قدِّمناالدعاء
بعد ضَمَّةْ عسلها باقى
واحترق فينا الفراق
النجوم تلمح جزعنا
والقمر باهدى السناء
هافتكر لك لحظة حلوة
وانسى فيها الانحناء