باستخبى ف احتدامى
لما بانكش فيَّه حزمة
من آلامى
واخدش الصمت الكئيب
يتنسخ ف الذات مقامى
وانضوى تحت الملامة
والشحوب
ينفرط عقد الصبابة
والربابة تنوح وتبكى
م الغرابة والغيوب
كان لى هدهد
ضاع ف سكة
والمسكة شموس ..ضبابنا
غطى فيها..شروق مخاضه
بينولد تحت الكفوف
طوف وشوف
ايه اللى خلى الميه تخنق كل سبط وله عيون
ف السواقى
والكتب فوق الرفوف
حتى خيل الصورة هِربِت
م الحروف
الملاحة اليوم عواصف
والسفن بوقها استغاثة
والدماء فتحت شهية
حوت بيبحث ع الدماء
لو بدأت بهمزة لازم
تنتهى بالحرف باء
المعين بيضُخ عذبُه
واحنا نردم بالغباء
باستخبى فى ارتطامى
والصخور نزلت بكاء
مين يفجَّر فيها حبى
تحت علِّة الدلالة
سرب من أحلى الجفون
الغمامة ضلمة فاحذر
من عذابها
وقول لَها بالخير تحمِّل
وان توبها
يبقى توبنا
نور وقمح
البيات الشتوى ممكن
للضفادع
والقلوب السمحة رمح
باستخبى منى فيَّه
نور عنيَّة للى يجنح
للوفاء
الخواطر للى خاطر
ما انتظرشى للعزاء
الحقيبة مين سكبها
بين تراب الخوف هباء
ابن رشد ضج من
سحب الخلافة والاختلاف
الحمامة والغلاف
فن راقى
للى يفهم معنى كلمة ائتلاف
الشراكة اليوم فكاكة
واللى عرَّى وشُّه لينا
تفتكر إنه يخاف
الحقيقة مش للى سامع
الحقيقة للى شاف
والملك بيحث يوسف
للخزائن والعجاف
بس خوفى م القبيلة
والغجر وسط الموالد
واللطاف
الطقوس الحمرة فاحت
والنقوش ع الخد شاردة
بالطواطم
ده بيعبد
ده بيسجد
ده بيعزف للى فاطر واللى صايم
مين يجيب العرش عندى
وينتهى نظم المعاجم
الوسخ ف الذات بيلدغ
أعتى منه ف البراجم
كوخ بيكفى لو نوازن
بين عالينا والحضيض
كوخ بيكفى لو ببسمة
موزعة بين اللى ضحى
واللى ناوى يكون مريد
نثر فايح بالخيال
يدينى حس بلون جديد
زى شطرة لو تصحِّى
نومة فينا بالقريض
الشاعر وحيد راغب
