ما تعديش النهر بقرفة
عضمى اتكسر
واللى بنيته
راح يتفسر
الاحلام ما بقلهاش رجة
والاحداث منزوعة الريش
واللى اترجى
عانده رغيف بيقول له
تعيش
ساعة بتجف
وساعة بتمطر وسط الصيف
عين بتنز خضار بيفرح
عين بتطق شرار مولوتوف
قلب بيفرط رمان حب
وقلب كصخرة عارفة حكاية
رمى الجب
كف الزيطة بدعم السما
والأرض
ولم اشلاءك جنب الحيطة
واحرص تحمى الرؤى
والعرض
جايلك من جواك
أمواج وطوفان
ومن براك
مليون شيطانة وشيطان
كرس وقتك مترس يومك
واحفظ كلمة سر الباب
وابعد عن أرقام لميلادك
وحروف اسمك
خليك واعى
لفك الشفرة
واحفر حفرة تلملم فيها
صهاينة مجوس
واردم حتى عرقنا ينز فئوس
وانشر فوق صفحة أنفاسك
(شير) نغم الدنيا ودوس
جايز ينطح فيك بغباوة
عجل سمين بقرون
وجايز ينشد ليك من فوق أيكاته
بلبل حى بألف (قانون )
ناجى صباك من تحت لحافك
خلى الفجر فى عز الصحوة
يبقى خشافك
ردد يا.. الله ما تخفشى
إنت ف دايرة حبه خلاص
اللى بنام ساعة ما يأدن
هو الباكى على الافلاس
متخليش للشيطان عقدة
تلف أفاك
قوم واتوضه
وصلى عشاك
فرصة تجمع حرف قصيدة
وعشرين بيت
خايف تبقى بيوتك خيمة
وألف مخيم
تبقى متيم باللاجئين
تفتح شرخ وخوخة فى زندك
ويطول عندك فى الضالين
بحر الموج
هلل جالك (سفر خروج )
ما تعديش النهر بقرفة
خلى حروف المد الصرفة
تبقى قانون
فتحة وشدة
وفعل العدة
وانت بتحلف وقت جنون
موجة الحر بقالها زبون
قلب عيشك بيع تكييف
عدا وراك واتعرا (نظيف )
التكييف للقادر بس
أصل الفقرا سحابة صيف
فشفش فكرك
شعتف سرك
الموال متقال من يوم
لما( تحتمس) قام م النوم
لقى (كليوباترا ) ف إيدها الفطرة
إن الغادر مش مظلوم
يا الله يا (خفرع ) خد لك حتة
واوعى تهرج مع صهيون
يملى حقيبتك وانت باصص له
شقا وديون
اعرض طاقتك
وسط الصورة
وان (قناتك) زى (آتون )
تشرق..
تشرق كل جناين الحب
زهزه وردك عبد ليهم
ألف مطب
إنت المصرى معجون فطرة
عمر ما لوث فيها الفجرة
تصحى يصحى الكون وياك
صورتك يوسف
باحضن أحمد
جوا الكعبة
عمر مغرك يوم
كم لعبة
فيك السر بيجذب فيهم
يجيكوا يشربوا من نيل القلب
يفحفح فيهم شوق العيشة
ينعنع فيهم زهر الحب
