قبل ما يعض الحنان 
ف حلمة كانت نهر جارى 
السواقى والصوارى 
للأراضى لما تشرق 
والبحار لما موجها 
يهيج يغرق 
مين يفرق 
غير قلوب مليانة زيف 
والشريف يأجوج بينحت ف الجدار 
مليون خريف 
والأليف ما طلعله ديل 
لو بيقرا الحرف قاله 
عن أخيل 
والدليل عمره ما يكذب 
لو شمس طالعة من مغارب 
أهله وناسه
والعقارب زى فاسه 
تعنى بكره 
والولاد
العناد فى الشر شر 
والعباد كرمها ربى 
يوم خلقها تكون مقر 
والزناد للسلم ضغطه 
مش عداوة 
أو غباوة 
أو لنار تحرق ف حر 
التمور م النخل ساقط 
لما حدفوه بطوب 
والوثوب للحق حق 
مش غروب
سد خرم الضيق يضيق 
والحروق حطلها مرهم 
بالعناية تقوم تروق 
الغشاوة ضباب عقول 
مش نقول 
كل منا بشوف بعينه 
والعيون الشايفة ترحل 
عن معينه 
هو بس النور وغيره 
وحل ضلمة 
هيه كلمة منه تفرش
ألف سطر 
هو قطر ملوش وقوف
هو سيف الحق بس 
والبقية ضلال بيغوى ف العروق 
كل شهقة منه شوق
والشقوق ترعى ف جسدنا 
هو مدنة 
وكل مدنة وليها ذوق 
حمى نفسك م الجنابة 
والحرابة 
والرتابة والغباء 
عمر حرف الحب صاحبى 
ما كان مواء 
البراءة والولاء 
فكر واسع مش حساب 
العتاب عمره ما كان
برصاصة حية أو رقاب 
خدنى فيك 
خدنى ليك 
لمنى 
وقت ماتبعترنى ريح
حسنى 
انا روح ودم 
مش صفيح 
خلى عينك تبكنى 
لما قلبى يكون جريح 
احنا وقت بين قوسين 
ف رحلة واحدة 
ليه مناهدة 
واحنا بكره نبقى ذكرى 
خلى كل ذكرى منا 
تبقى نسمة للغصون 
تبقى ضحكة ف ثغر طفل 
مش أنين