الهِشْك أكل الشعرية!!
كتبها: عبد الغني عبده
***
الناف شق لنفسه قناية؛
على رقبتي المحنية؛ بمذلة؛
من يوم ما العمدة؛ فـ غفلة؛ أو تطنيشة!!
بقى عمدة؛ وكوش على كل التكويشة.
والغما نسَّاني عنيا!! ... ما خلاص هحتاج الشوف عشان إيه؟!
ومدار الساقية مليان بقزاز الخمرة المدشدش...
وأنا أدوس.... رجليا تشلب دم
والتور.... التور قاعد ومربع رجليه
وصِغِير الساقية بيئن...
هيتكسر من تقله عليه!!
التور ماسك فـ أيدية نقز من البرقوق الاحمر؛
لو طال جلد حمار ميت يشلب دم!!
وعلى شماله نااااااااااااااااي!!
وأنا بجري وألف وأدور... خايف م النقز
والبير فااااااااااااااضي... مافيهوش ولا ندعة مَيْه
ما فيهوش ولا نقطة جااااااااااااااااز!!
والتور بيغني لحن نشاز...
والناي من كتر الغيظ عاوز يقزح من جنبه
ومرات العمدة تطل من الدوار تصرخ:-
ما حلبتوش التور يا كلاب!!
ما حلبتوش التور يا كلاب!!
وما حدش بيرد...
لأن العمدة قطع كل السنة الناس!!
والدم مغرق كل الأرض!!
الأرض زمااااااااااان ما كنتشي بتشرب دم
دلوقتي الدم صبح أنهار
والأرض بتسكر منه ليل ونهار
وتنام تتقلب بين أحضان العمدة والخصيان!!
وبتولد – رغم إن العمدة عقيم– بدل الخضرة ... عمدان خرسان!!
من دمي نبتت - جنب مدار الساقية – عشبة
الناس مش لاقيه الجعضيض والرجلة ...
أكلوا العشبة..... ما اتبلعتشي!!
لكن؛ كل اللي أكلها طلعلوا لسان!!
ومرات العمدة تطل من الدوار تصرخ:-
ما حلبتوش التور يا كلاب!!
ما حلبتوش التور يا كلاب!!
فيرد الناس:-
ما خلاص يا ولييه!!
"الهشك أكل الشعرية"
والعمدة أهو مات ... ولا خلف واد ...
ولا كان له بنات.
وبدال ما يشيلوا الناف من فوقي
وبدال ما يجُرُّوا التور من فوق الساقية!!
سايبين رجليا بتشلب دم...
وأنا خايف من النقز البرقوق الاحمر!!
وهم هناك بيغنوا:- الهشك أكل الشعرية!!
