وقال لِي يا أمّهْ
وقالي يا أمّةْ ضُميني
دا حُضنِك آخر أحضاني
أنا مسافر علي حدودي
وحاسس مش راجع تاني
وحالف يا أمّهْ صُبح وعصر
أكون ليكي شهيد تاني
دا أخويا سبقني ع الجنة
حَلِفْتُه يحجز لي مكاني
دموعك سيل يطهرني
اذا ف غفلة مني عصياني
ودمي لو سبب عزك
فداكي ياكل أوطاني
وودعته وأنا صابرة
وب أدعي يخفف أحزاني
دا عمر العمر غاب عني
وخد فرحي ورضا زماني
فِضِلتْ أصلي وأسبح
وصورته شهيد محوطاني
ونمت وغَفِلُوا عيوني
وشُفت الجنة عنواني
مسحت الدمعة من خدي
وقلت السعد هناني
دا يوم مابلادي تحتاجني
يهون العمر وزماني
كفاية إني أم شهيد
بدمة سطرت عنواني
