وادعى لك بشمس الحب
وباضحك لك
وكل الدنيا فوق راسى
لأنك حتة من قلبى
ونبراسى
باغنى لك
وادغدغ نفسى جوايا
واكون نيلك
ليهنى الشرب من كاسى
يا ضى الروح ونسمتها
وفجر القرب
أفراسى
باخاف من موجة تلعب بك
وليل آواه
وكون آسى
يهون الفرح لو تحزن
واشوف ف جبينك القسوة
وادعى لك بشمس الحب
ينشرها جمال ربى
على القاسى
هنا فى القيد أحلامى
يحررها فراشات
يخدرها زهور وطنى
بآدان وأجراس
رمت والدنيا مش قادرة
على صهيلها
دما الثورة
لناس تكره سواحلهم
وخناس
تدرع قلبى والآهة
بتتفجر
على وجهى
لمين باعوا طريق بكرة
عرق خدى
شقا فاسى
ولما استدعى فى حقيبتى
تاريخ عيسى واخناتون
جمال إدريس
وأفلاطون
وحتشبسوت
وشجرة در والياقوت
حشود من نور
بريد ناسى
وباضحك لك
وباتفتت عشان ألمى
ما يوصلشى
ودمع العين بيتجمد
عشان ما تشوفشى آهاتى
وما تخافشى
وتفضل جوا أحلامك
ما تخرجشى
وتصبح زى عصفورة
برغم البرد والأرياح
تغنى غصونا ما تنامشى
تخلى الضلمة زى نهار
نجوم طالعة بقلب كبير
ما ترمشى
حبال عرافة الساسة
قطعها الشعب بصراخه
شباب فارد نيران قومته
وبيعشش على افراخه
هتاف صمته سبق حرفه
ولم النظرة فوق كفه
بدرها شوارعه والحارات
وكان خارج شعاع حبه
ويتمدد ورا منه
وقدامه
وبيخطى حدود قارات
ما عادشى الضحكة تهنى له
يا إما يودع الخاينين
ويرفع رايته فوق دمه
يا إما يعيش بدون خوفه
ولما ولاده تنده له
يكون همه
يفوت م الصخرا والجبروت
ويبنى صارحه فى عطارد
وينسى الزفة والنبوت
تعيش بلدى تعيش بلدى
