خالديات...
عتم غفيان خلف هاك الباب
وحجار مشقوعة على كتافو
ينطر بلكي بيرجعو الغيّاب
فرشتو الاطلال السما لحافو
..........    ..........      ............
وسراج مطفي معلّق بمسمار
    شح زيتو نشّف فتيلو
كحّل عيون الليل بالشحتار
  عن هجرة فراشات يحكيلو
..........     .........     .............
    هون كنّا نرصد الايام
نكتب على الحيطان امل بكرى
وسنين كِبْرِتْ محّت الاحلام
وترجع طفولة تلملم الذكرى
..........     ..........     ............
واسأل الاطلال عنّك والغروب
والعمر ورْقة شلّعها الهوا
تاهت ما  بين دروب وقدر مكتوب
ما في حدا من تنين راح يبقو سوا
..........      .........     ...........