بعينى أنا شوفتها أجمل من القمر
وفي بحور عيونها الغدارين
طال السفر
وفي شعرها الغجرى الحزين
عشقت السهر
كنت بحلم من زمن
إنى اشوفها لوحدها
الليله جاتنى في المنام
ولمستها
كانت بتتمشى ف بستان
وكأنها
عصفور كناريه وحسنها
يفوق الخيال
أنا شوفتها
ماسكه ورده من غصنها
بتشدها
وبرقه قلبها صعب عليها
تقطفها من حضن أمها
وقربت الوردة من خدها
احتار فؤادى بسحرها
ومبقتش عارف بتشم
الوردة ولا الوردة بتشمها
يا حسن ساكن ع الشفايف
وقلبى يتمنى يسكن معاها
بس شايف
إنها سرحانه في ملك تانى
قولت بلاش أبقى انانى
واقطع عليها خلوتها
وبصراحة عجبتني حلاوتها
وهى على طبيعتها
وقررت اتفرج من بعيد
وأنا كمان قلبى سعيد
وهى فكرها كان شريد
ومشيت وكأنها سكرانه
وعيونى عليها حيرانه
ساعات اشوفها عيان
وساعات من بين الأغصان
زى فراشه تحط وتطير
وقلبى معاها أصبح أسير
والهواء يداعب شعرها
ساعات يدارى وشها
وساعات يغطى ضهرها
فكرت إنى أروح لها
وأرمى دماغى فى حضنها
واقولها انتى حياتى كلها
معرفشى ليه فضلت السكوت
وكأنى لو قربت منها هموت
لكن بسرعة جانى صوت
قاللى ألحق العمر هيفوت
والفرصة مبتجيش بالساهل
والبنت تستاهل
ف خلاص قررت المسير
ولسه بتحرك لقتنى وقعت من السرير
سعيد عباس الضو
